Աջակցություն երիտասարդ գիտնականներին

20

2022թ. հունիսի 20-ին ՀՀ Գիտությունների ազգային ակադեմիայում տեղի ունեցավ հանդիպում՝ «Երիտասարդ գիտնականների աջակցության ծրագրի» (ԵԳԱԾ) շրջանակներում իրականացվող «Երիտասարդ գիտնականների վերապատրաստման ծրագրի» մրցույթի վերաբերյալ:

Ծրագրի ընդհանուր բյուջեն 28 միլիոն ՀՀ դրամ է: Յուրաքանչյուր դրամաշնորհը՝ 3-5 միլիոն ՀՀ դրամ: Վերապատրաստման ժամկետը 1-6 ամիս է: Հայտերի ընդունման վերջնաժամկետը հունիսի 30-ն է:

«Երիտասարդ գիտնականների վերապատրաստման ծրագրի» նպատակն է ծանոթացնել ուսանողներին արտասահմանյան առաջատար գիտահետազոտական կազմակերպություններում եւ լաբորատորիաներում գիտական աշխատանք կատարելու մշակույթին, խթանել բարձր որակի աշխատանք կատարած ուսանողներին շարունակել գիտական ուղին, զարգացնել գիտաշխատողների մասնագիտական հմտությունները, բարձրացնել գիտահետազոտական աշխատանքների եւ գիտական հոդվածների որակը, ստեղծել կամ ամրապնդել միջազգային համագործակցությունները:

Այս ծրագրով գիտական ուղղությունների սահմանափակում չկա: Դիմորդ կարող են հանդիսանալ Հայաստանի եւ Արցախի ԲՈՒՀ-երի, գիտական կազմա-կերպությունների մագիստրոսները, ասպիրանտները, գիտական աստիճան չունեցող գիտաշխատողները, ինչպես նաեւ գիտության թեկնածու հանդիսացող երիտասարդ գիտնականները:

-«Միջազգային համագործակցության որակական աճը, մեր տեսանելիության բարձրացումն աշխարհում այսօր ազգային անվտանգության խնդիր է, առաջին հերթին՝ հումանիտար ոլորտում: Ես առաջարկում եմ ձեզ մեկ կարգով բարձրացնել ձեր ակտիվությունը բոլոր ուղղություններով՝ եւ՛ գիտական, եւ՛ հասարակական, երիտասարդական շարժումներում: Հիշեք, որ մենք ապրում ենք տեխնոլոգիաների դարում, որի կենտրոնում գիտությունն է, եւ այսօր ձեր՝ գիտնականների գործելու ժամանակն է»,- նշեց  ՀՀ ԳԱԱ ակադեմիկոս-քարտուղար Արթուր Իշխանյանը:

Ստեփան  ՊԱՊԻԿՅԱՆ