– Մեկ բնորոշում կարող եմ տալ «շիլա-շփոթ»: Այս կառավարությունը երբեւէ որեւէ օրենքի ներդրման ժամանակ նախապատրաստական աշխատանք չի կատարում:
Անցում դեպի անկանխիկ գործարք. պատրա՞ստ էին արդյոք համակարգն ու հասարակությունը: Անկանխիկ գործարքների մասին օրենքի ուժի մեջ մտնելուց դեռ երկու ամիս էլ չի անցել, բայց նույնիսկ օրենքն ընդունած իշխանություններն են խոստովանում, որ բազմաթիվ խնդիրներ կան:
Անկանխիկ գործարքների անցնելու ճանապարհին բազմաշերտ խնդիրներին լուծումներ չեն տրվում: Տնտեսվարողները մանրամասնում են՝տեխնիկական խնդիրները դեռ լուծված չեն, փորձագետներն էլ հավելում՝ երկիրը պատրաստ չէր:
«Հայաստանի մարզերում, հատկապես գյուղական բնակավայրերում, դեռեւս չկան համապատասխան ենթակառուցվածքներ. սահմանափակ է բանկերի, բանկոմատների ու տերմինալների թիվը: Նոր օրենքը ստեղծում է լրացուցիչ ծախսեր եւ անհարմարություններ վարկային վատ պատմություն եւ արգելափակված հաշիվներ ունեցող անձանց համար »,- մեզ հետ զրույցում նշում է տնտեսագետ Մնացականյանը:
Օրենսդրական կարգավորումներից մինչեւ տեխնիկական հագեցվածություն, հանրային տրամադրություններից մինչեւ թվային նոր հարթակների ներմուծում, նոր պարտադրանք հիշեցնող օրենքը, որը կոռուպցիոն ռիսկերն է փորձում նվազեցնել, դեռեւս այդքան էլ արդյունավետ չէ:
«Այստեղ ոչ միայն գործողությունների բովանդակությունն է կարեւոր, այլ նաեւ այն, թե դա ինչ ազդեցություն կապահովի: Տարբեր ծառայություններ մատուցողները, որոնք անկանխիկ ճանապարհով վճարվելու են 300 հազար դրամի շեմը գերազանցելու պարագայում, հարկերը շրջանցելու ճանապարհներ կգտնեն: Օրինակ՝ ծառայության գումարը հարկ վճարելուց առաջ կարող են նշել 50 հազար դրամ, բայց ծառայության համար վերցնել 300 հազար եւ ավելի դրամ: Այսինքն՝ մնացած գումարը կվերցնեն կանխիկով»,- նշում է իրավաբան Աննա Սարգսյանը:
Մայրաքաղաքում անկախ գումարի չափից անկանխիկ պետք է լինեն նաեւ բժշկական բոլոր ծառայությունների դիմաց վճարումները, աշխատավարձերն ու ուսման վարձերը, ինչը քաղաքացիները ավելորդ գլխացավանք են համարում:
Հիվանդանոցներում խնդրահարույց է, եւ՛ ծառայությունների դիմաց վճարված գումարի վերադարձը, եւ՛ գանձնվող միջնորդավճարների հարցը:
«Երբ վճարումը կատարվել է, սակայն վիրահատությունը տեղի չի ունեցել էդ գումարը ո՞նց են հետ տալու, եթե ես եմ ու քարտ չունե՞մ: Չգիտեմ, ավելի բարդացնում են, նոր օրենքներ են հորինում»,- դժգոհում է մի քաղաքացին:
Կան խնդիրներ, որոնք փաստացի դեռ կարգավորված չեն: Իսկ կառավարությունը օրենքի կիրառումից փորձ ստանալուց հետո ե՞րբ փոփոխություններ կանի, մեծ հաշվով դեռ պարզ չէ:
ՀԱՍՄԻԿ ԱՎԵՏԻՍՅԱՆ
