Ամերիկայի Հայ դատի հանձնախմբի գործադիր տնօրեն Արամ Համբարյանն օրերս հայտարարություն էր տարածել՝ նշելով, թե ԱՄՆ-ն նվազեցնում է Հայաստանին ու Արցախին տրամադրվելիք աջակցությունը:
Ամեն տարի բյուջետային քննարկումների ժամանակ հայ հայանքի ու լոբբիստական խմբերի գործողություններն ուղղված են այն բանին, որ ԱՄՆ-ն ֆինանսական խոշոր աջակցություն ցուցաբերի Հայաստանին ու Արցախին: «Ազգ»ի հետ զրույցում ասում է միջազգայինագետ Սուրեն Սարգսյանը՝ բացատրելով, որ ԱՄՆ Կոնգրեսի կողմից տարբեր ժամանակահատվածներում ֆինանսական տարբեր առաջարկություններ են ուղարկվում կառավարութանը՝ քննարկելու համար, թե որքա՞ն է կազմելու Հայաստանի ու Արցախին տրամադրվող աջակցությունը:
«Այս տարվա ընթացքում այն առաջարկածից, որ Կոնգրեսի կողմից արվել է գործադիր իշխանութանը, կրճավել է մոտավորապես 45 տոկոսով, իսկ Արցախին օգնություն տրամադրել ընհանրապես նախատեսված չէ: Մեր լոբբիստներն ու հայ համայնքն իրենց աշխատանքն արել են: Կարծում եմ՝ համապատասխան աշխատանք չի արվել Հայաստանի կողմից, վարչակազմի հետ ակտիվ աշխատանք չի տարվել, ու վարչակազմն Արցախին ուղիղ օգնություն չի տրամադրի»,- նշում է Սարգսյանը:
Իսկ որպեսզի Արցախին որեւէ տեսակի օգնություն չտրամադրվի, ավելացնում է մեր զրուցակիցը, ադրբեջանցիները շատ ակտիվ են աշխատում այդ ուղղությամբ, ու հետեւանքն այն է, որ այս պահի դրությամբ ԱՄՆ-ի այս տարվա բյուջեում Արցախին աջակցություն տրամադրելու դրույթ այս պահի դրությամբ ներառված չէ:
ՀՅԴ Հայ Դատի Կենտրոնական խորհրդի հատուկ ծրագրերի պատասխանատու Գեւորգ Ղուկասյանը սակայն հարցը փոքր-ինչ այլ կերպ է մեկնաբանում: Ըստ նրա՝ Ամերիկայի կողմից Հայաստանին տրվող աջակցության չափը դեռ կարող է մեծանալ, ընդհուպ՝ կրկնապատկվել:
«ԱՄՆ նախագահը յուրաքանչյուր տարի ներկայացնում է հաջորդ տարվա ֆիսկալ ծրագիրը, ընդհանարապես՝ ֆիսկալ քաղաքականությունը: Անցած տարի նույնպես ԱՄՆ նախագահ Բայդենը ներկայացրել էր Հայաստանին տրամադրվելիք օժանդակության չափը, ինչը վերջում կրկնապատկվել ու հասել էր 50 մլն դոլարի: Հայ դատի հանձնախմբի ջանքերով ու կոնգրեսի առաջարկով այդ գումարը կրկնապատկվել էր: Դրա մեջ նաեւ Արցախին տրամադրվող 2 մլն դոլարն էր ներառված, ինչով նախատեսվում էր ականազերծում իրականացնել Արցախում»,- բացատրում է Ղուկասյանը:
Հիմա, ըստ էության, նույն իրավիճակն է, «Ազգ»ի հետ զրույցում ասում է ՀՅԴ-ականն ու ընդգծում. «Իհարկե լավ չէ, որ Բայդենը ի սկզբանե օժանդակության քիչ գումար է նախատեսել Հայաստանի համար, բայց այս հանգամանքը Հայաստանի նկատմամբ Ամերիկայի քաղաքականության փոփոխություն կամ հատուկ դիտավորություն չի կարելի համարել: Չի բացառվում, որ հայկական կառույցների աշխատանքի շնորհիվ՝ աջակցության թիվն այս տարի էլ կարող է մեծանալ»:
ՍԵՎԱԿ ՎԱՐԴՈՒՄՅԱՆ
