Մարտակերտի Հայոց լեզվի և գրականության ուսուցչուհի Նատաշա Պողոսյանը ներկայացրել է, թե հիշատակի ինչպիսի միջոցառումներ են անցկացվել 44-օրյա պատերազմի մեկնարկի տարելիցին Մարտակերտում:
«Հայրենյաց նահատակների հոգիների խաղաղության համար հոգեհանգստյան կարգ էր Մարտակերտի Սուրբ Հովհաննու Կարապետ եկեղեցում։ Անդառնալի կորուստը քաղաքի հասարակությանը իր շուրջն էր համախմբել պատերազմի տարելիցին, թարմացրել այն սարսափելի մղձավանջը, որով անցել է ազատության համար մաքառող մեր ժողովուրդը։ Այցելեցինք «Փա՜ռք ազատամարտիկներին» հուշահամալիր, ծաղիկներ խոնարհեցինք անմեղ զոհերի հիշատակին։ Երկրորդ հերթի դասերս բոլորովին տարբեր էին այսօր` դասանյութից հեռացած, մեր զոհվածների մասին, 44-օրյա պատերազմի արհավիրքներից, մեր կորուստներից…Բոլորի լուռ հայացքներում հոգեմաշ ցավ կար, երբ իրենք էլ այն մահաբեր պատերազմի ականատեսներն էին»,- գրել է նա։
