Սիրիան մտադիր է ամբողջությամբ վերականգնել ազգային ինքնիշխանությունը և անօրինական է համարում իր տարածքում ցանկացած օտարերկրյա զորքի առկայություն՝ չհամաձայնեցված հանրապետության կառավարության հետ: Այդ մասին հայտարարել է Սիրիայի արտգործնախարար Ֆեյսալ Միքդադը՝ ելույթ ունենալով ՄԱԿ-ի Գլխավոր ասամբլեայի 76-րդ նստաշրջանի ընդհանուր քաղաքական բանավեճում:
Նրա խոսքով՝ Թուրքիան և ԱՄՆ-ն «կեղծ պատրվակներով շարունակում են իրենց ռազմական ներկայությունը Սիրիայի տարածքում և թալանում են նրա բնական պաշարները, ինչը հակասում է միջազգային իրավունքին և ՄԱԿ-ի Անվտանգության խորհրդի բանաձևերին»:
«Դա պետք է ավարտվի, և մենք պահանջում ենք, որ Թուրքիան և Միացյալ Նահանգները դուրս բերեն զորքերը Սիրիայից առանց որևէ նախապայմանի», – ընդգծել է Միքդադը: Նա միաժամանակ նշել է, որ Դամասկոսը «իրեն իրավունք է վերապահում բոլոր օրինական միջոցներով հասնել այդ նպատակին», հաղորդում է ՏԱՍՍ-ը:
