Ադրբեջանական լրատվամիջոցները հրապարակել են երկրի նախագահ Իլհամ Ալիևի, Թուրքիայի նախագահ Ռեջեփ Թայիփ Էրդողանի և նրա կնոջ` Էմինե Էրդողանի` հունիսի 15-ին դեպի Շուշի ուղևորվելու ժամանակ տեղի ունեցած զրույցից մի հատված, որը վերաբերում է օրերս 15 հայ գերու վերադարձին և դրա դիմաց Լեռնային Ղարաբաղի ականապատ տարածքների քարտեզների փոխանցմանը:
Ստորև ներկայացնում ենք զրույցի տեքստային տարբերակը` մասնակի կրճատումներով.
Իլհամ Ալիև. Մենք հիմա Ֆիզուլի (Վարանդա) քաղաքում ենք…Այս վայրերը լի են ականներով… Այստեղ ճանապարհից չի կարելի շեղվել ո՛չ աջ, ո՛չ ձախ: Մենք տասնհինգ գերի տվեցինք և վերցրեցինք ականապատված բոլոր տարածքների քարտեզը:
Ռեջեփ Թայիփ Էրդողան. Ե՞րբ է դա տեղի ունեցել:
Իլհամ Ալիև. Ամսի 12-ին:
Ռեջեփ Թայիփ Էրդողան. Այսինքն` օրերս:
Իլհամ Ալիև. Այո, բայց որևէ ստորագրում չի եղել:
Ռեջեփ Թայիփ Էրդողան. Նրանց փոխանցած քարտեզները ճի՞շտ են ցույց տալիս ականապատված վայրերը:
Իլհամ Ալիև. Այո, ճիշտ են ցույց տալիս , քանի որ ամերիկացիները հանդես են եկել որպես երաշխավոր: Նրանք մեզ տվեցին Աղդամի (Ակնա) շրջանի 97 000 ականների քարտեզներ:
Ռեջեփ Թայիփ Էրդողան. Ես չգիտեի, որ այդքան շատ ական կա Ադրբեջանի ստացած քարտեզների վրա:
Իլհամ Ալիև. Եթե մենք ստանանք ականապատված բոլոր տարածքների քարտեզները, ապա դա մեզ մեծ առավելություն կտա, քանի որ առանց դրա աշխատանքը տևելու է 10 տարի, քանի որ ականապատված է ամբողջը:
Էմինե Էրդողան. Այլ գերինե՞ր էլ կան:
Իլհամ Ալիև. Կան, կան:
Էմինե Էրդողան. Մաս-մաս (նկատի ունի հայ գերիների հանձնումը-Խմբ.):
Tert.am
