Թուրքիայի և Եգիպտոսի արտաքին գործերի նախարարությունների պատվիրակությունների կողմից Կահիրեում անցկացված քաղաքական խորհրդակցություններն անցել են անկեղծ մթնոլորտում և ունեցել համապարփակ բովանդակություն: Այս մասին ասվում է Թուրքիայի ԱԳՆ հայտարարության մեջ:
«Երկկողմ հարցերի հետ մեկտեղ բանակցություններում քննարկվել են նաև տարածաշրջանային թեմաներ` շեշտը դնելով Լիբիայում, Սիրիայում և Իրաքում տիրող իրավիճակի վրա: Բացի այդ՝ ընդգծվել է Արևելյան Միջերկրական ծովում խաղաղության և անվտանգության ապահովման անհրաժեշտությունը»,- ասվում է հայտարարության մեջ:
Թուրքիայի ԱԳ նախարարությունը հավելել է, որ Անկարան և Կահիրեն կգնահատեն բանակցությունների առաջին փուլի արդյունքները և կորոշեն հետագա քայլերը:
Պատվիրակությունները ղեկավարել են Թուրքիայի փոխարտգործնախարար Սեդաթ Օնալը և նրա եգիպտացի պաշտոնակից Համդի Սանադ Լոզան:
Հիշեցնենք, որ երկու երկրների հարաբերություններն ընդհատվել էին 2013 թ.։ Հարաբերությունների վերականգնման նախաձեռնությամբ հանդես է եկել Թուրքիան։
