Թուրքիայի խորհրդարանը դատապարտել է Բայդենին «Հայոց ցեղասպանության» մասին հայտարարության համար
Թուրքիայի խորհրդարանը բանաձև է ընդունել, որով դատապարտում է ԱՄՆ նախագահ Ջո Բայդենին Օսմանյան կայսրությունում «Հայոց ցեղասպանությունը» ճանաչելու համար: Բանաձևի քվեարկությունը տեղի է ունեցել երեքշաբթի օրը Մեջլիսում:
«Խորհրդարանը խստիվ դատապարտում է Ջո Բայդենի` ապրիլի 24-ին արված և հայկական լոբբիի ուղերձները պարունակող հայտարարությունները: Մենք մերժում ենք այդ անհիմն հայտարարությունները: Դրանք ոչ մի ազդեցություն չունեն մեզ համար», բանաձևի տեքստը մեջբերում է CNN Turk TV-ն:
Խորհրդարանը նաև կոչ է արել Ամերիկայի առաջնորդին «շտկել այդ սխալը, որը խորապես վիրավորել է թուրք ազգին»:
Բայդենի խոսքերը, ըստ խորհրդարանականների, «անխուսափելիորեն կվնասեն երկկողմ հարաբերություններին»:
