Ընդդիմադիր պատգամավորները Մայր Աթոռում ստացան Վեհափառի օրհնությունը
Ազգային ժողովի 9-րդ գումարման առաջին նստաշրջանի անդրանիկ նիստից անմիջապես հետո «Ուժեղ Հայաստան» և «Հայաստան» խմբակցությունների պատգամավորները եկել են Մայր Աթոռ` ստանալու Վեհափառ Հայրապետի օրհնությունը։
Հիշեցնենք, որ ՀՀ 9-րդ գումարման Ազգային ժողովն այսօր իր առաջին նիստն սկսեց առանց Վեհափառ Հայրապետի օրհնության։
«Գնահատում եմ այն ամենի համատեքստում, ինչ անում է իշխանությունը, մասնավորապես՝ իր նախընտրական ծրագրում ամրագրել էր Կաթողիկոսի հեռացման խնդիրը, և հետևաբար նաև տրամաբանական էր՝ այսօր իրենք չէին կարող հրավիրել Ամենայն Հայոց կաթողիկոսին»,- լրագրողների հետ զրույցում ասել էր «Հայաստան» խմբակցության ղեկավար Աննա Գրիգորյանը։
Նա հայտնել էր, որ «Հայաստան» և «Ուժեղ Հայաստան» խմբակցություններն ԱԺ նիստից հետո կայցելեն Մայր Աթոռ։
