Մենք գտնում ենք, որ մեր դիմումի շրջանակներում ներկայացված ընտրախախտումները եղել են զանգվածային, համակարգային, բավարար են, որ ՍԴ-ն պատասխանողի՝ ԿԸՀ-ի ընդունած որոշումը ճանաչի անվավեր, իսկ բխող հետևանքները թող որոշի Բարձր դատարանը: ՍԴ-ում այսօրվա իր ելույթի ժամանակ այս մասին հայտարարեց «Ուժեղ Հայաստան» դաշինքի ներկայացուցիչ, փաստաբան Արամ Վարդևանյանը։
«Մենք դատաքննություն ենք ունենում ինտենսիվ աշխատանքային ծանրաբեռնվածությանբ, իսկ այդ ընթացում ՔՊ-ն իրենց պաշտոններն է որոշում՝ իմանալով հանդերձ, որ նույն այդ որոշումները կարող են ունենալ 0 արժեք, եթե ՍԴ-ն որոշում է ընտրության արդյունքները ճանաչել անվավեր, նշանակել երկրորդ փուլ կամ սահմանել մանդատների բաշխման նոր կարգ»,- նշեց նա։
Ըստ Վարդևանյանի՝ սա կարող է բացասական ազդել, բայց ՍԴ-ն վերիշխանական մարմին է, կարող է լինել այդպիսին, պետք է լինի այդպիսին։
Նրա խոսքով, ԿԸՀ-ն անկախության դեֆիցիտ ունի։
«Մենք խոսում ենք այնպիսի ընտրության արդյունքների մասին, որտեղ որևէ մեկ ուժ 50 տոկոսից ավելի ձայն, հանրության վստահության քվե չի ստացել։Հետևաբար նույնիսկ թվով 10, 20 ընտրական տեղամասերի արդյունքների վերանայումը կամ վերաքվեարկությունն էական ազդեցություն կարող է ունենալ»,- շեշտեց Արամ Վարդևանյանը։
Ըստ «Ուժեղ Հայաստան» դաշինքի ներկայացուցչի՝ դատաքննության ընթացքում անձինք, որոնք տարիներ ի վեր քննադատել են գործող Ընտրական օրենսգիրքը, հանդիսացել են այս ԸՕ դեմ մարտիկներ, բազմաթիվ բողոքներ են ներկայացրել, հանդես էին գալիս այս Ընտրական օրենսգիրքը պաշտպանղների դիրքերից, ինչն իսկապես զարմանալի է։
Հիշեցնենք, որ «Ուժեղ Հայաստան» կուսակցությունների դաշինքը պահանջում է անվավեր ճանաչել ընտրությունների արդյունքները, կամ նշանակել ընտրությունների երկրորդ փուլ՝ հիմք ընդունելով իշխանությունների կողմից կազմակերպված զանգվածային ու կազմակերպված ընտրախախտումները։
