Քրեակատարողական հիմնարկներում պահվող անձանց առողջապահական ծառայությունների հասանելիության և որակի բարելավման ուղղությամբ վերջին տարիներին զգալի աշխատանք է իրականացվել, այսօր տեղի ունեցած մամուլի ասուլիսի ժամանակ հայտարարեց ՀՀ առողջապահության նախարար Անահիտ Ավանեսյանը։
Ըստ այդմ՝ հատկապես բարելավվել են անազատության մեջ գտնվող անձանց բժշկական ծառայությունները։ Մասնավորապես, «Արմավիր» ՔԿՀ-ում գործում է 100 մահճակալանոց բժշկական բաժանմունք, որը համապատասխանում է լավագույն չափանիշներին։ Ինչ վերաբերում է մյուս քրեակատարողական հիմնարկներին, ապա դրանցում շարունակվում են ենթակառուցվածքների արդիականացման և բժշկական սարքավորումներով հագեցման աշխատանքները։
«Ես երաշխավորում եմ, որ յուրաքանչյուր անձի ցուցված բժշկական ծառայությունները լիարժեք տրամադրվում են։ Բոլորը հավասարապես օգտվում են իրենց իրավունքներից՝ թե՛ դեղորայքային ապահովման, թե՛ հետազոտություններ անցնելու, թե՛ անհրաժեշտ բժշկական ծառայություններ ստանալու առումով»,- ասաց նախարարը։
Նա միաժամանակ նշեց, որ որոշ քրեակատարողական հիմնարկներում ենթակառուցվածքների բարելավման ուղղությամբ դեռևս զգալի աշխատանք պետք է իրականացվի։
