Հեռախոսազրույց են ունեցել Ադրբեջանի Հանրապետության արտաքին գործերի նախարար Ջեյհուն Բայրամովը և Թուրքիայի Հանրապետության արտաքին գործերի նախարար Հաքան Ֆիդանը, հայտնել է Ադրբեջանի Արտաքին գործերի նախարարությունը. տեղեկացնում է APA-ն:
Նշվում է, որ կողմերը քննարկել են Ադրբեջանի և Թուրքիայի միջև դաշնակցային հարաբերություններից բխող հարցերը, երկու երկրների միջև առկա ռազմավարական համագործակցության օրակարգը, ինչպես նաև միջազգային և տարածաշրջանային կազմակերպությունների շրջանակներում փոխգործակցության և համակարգման հարցերը։
Ընդգծելով, որ եղբայրական երկրների միջև երկկողմ հարաբերությունների հիմքում ընկած են բարձր մակարդակի քաղաքական երկխոսությունը և փոխադարձ աջակցությունը՝ նախարարները նշել են փոխադարձ հետաքրքրություն ներկայացնող բոլոր ոլորտներում սերտ համագործակցության շարունակականության կարևորությունը։
Հեռախոսազրույցի ընթացքում նաև կարծիքներ են փոխանակվել տարածաշրջանում անվտանգության ներկայիս իրավիճակի, ինչպես նաև տարածաշրջանային խաղաղության և կայունության ապահովմանն ուղղված քայլերի վերաբերյալ։
