Ընդդիմությունը գիշերը կարող էր շատ բան ուրվագծել, հայտարարել, որ ինքն է հաղթել. նա բաց թողեց «հեղափոխական պահը». Բենիամին Մաթևոսյան

Երեկվա ընտրություններից հետո մենք թևակոխել ենք տնտեսական և քաղաքական ճգնաժամի նոր փուլ, Azg.am-ի թղթակցի հետ զրույցում ասաց քաղաքագետ Բենիամին Մաթևոսյանը։

«Այս ընտրություններն ունեն մեկ հաղթող, և այդ մեկ հաղթողը Սերժ Սարգսյանի գրած Սահմանադրությունն է։ Դա «Ֆրանկենշտեյնի սահմանադրություն» է (փոխաբերական արտահայտություն է, որն օգտագործվում է նկարագրելու համար այնպիսի սահմանադրական փոփոխությունները կամ պետական կառավարման մոդելները, որոնք կազմված են իրար հետ անհամատեղելի իրավական դրույթներից,ինչպես Վիկտոր Ֆրանկենշտեյնի հրեշը, որը կարված էր տարբեր մարդկանց մարմիններից՝ խմբ.):

Նորմալ չէ, երբ 48 տոկոս քվե ստացած ուժն ստանում է խորհրդարանի 60 տոկոս մանդատները։ Դրա համար մենք կարող ենք շնորհավորել այն մարդկանց, որոնք գրել են այս Սահմանադրությունը և տվել են Նիկոլ Փաշինյանին։ Բայց Հայաստանը, մեղմ ասած, դրանից չի շահում։ Աշխարհաքաղաքական, քաղաքական-տնտեսական ճգնաժամը շարունակվում է։ Այս առումով մենք պարզապես ինքներս վատացրեցինք մեր վիճակը»,- ասաց մեր զրուցակիցը։

Անդրադառնալով ընդդիմության՝ մանդատները վերցնել-չվերցնելու որոշմանը՝ Բենիամին Մաթևոսյանը նկատեց՝ դատողություններ անելու համար պետք է սպասել քաղաքական ուժերի գնահատականներին, որովհետև կարելի է այս պահին գնահատողական դատողություններ անել, սակայն դրանք ժամանակավրեպ լինեն։

«Ես տեսել եմ՝ ոմանք ասում են, որ պետք է հանձնել մանդատները, մյուսներն ասում են, որ մանդատները չվերցնելով՝ ոչինչ չի փոխվի, այսինքն՝ դա ավելի շատ բարոյական ապտակ կարող է լինել իշխանությունների համար, բայց իշխանության քաղաքական գործունեության վրա  չի ազդի։ Եկեք իսկապես սպասենք քաղաքական ուժերի գնահատականներին։

Միայն մեկ բան կարող եմ ասել. Վլադիմիր Իլյիչ Լենինը մի ձևակերպում ուներ՝ «Հեղափոխական պահ»։ Կարծում եմ՝ այդ հեղափոխական պահն այս գիշերն էր՝ ժամը 01։00-ին, բայց չգիտեմ՝ ինչո՞ւ ընդդիմությունը չօգտագործեց այդ պահը։ Այն պահին, երբ հազիվ 10 տոկոս ձայների հաշվարկով Նիկոլ Փաշինյանը հապշտապ հայտարարում էր ՔՊ-ի հաղթանակի և միանձնյա կառավարություն կազմելու հնարավորության մասին, ո՞վ կամ ի՞նչն էր խանգարում ընդդիմությանը դուրս գալ և ասել՝ մենք էլ մեր տվյալներն ունենք, մենք ենք հաղթել»,- ասաց քաղաքագետը։

Անդրադառնալով հետընտրական հնարավոր զարգացումներին՝ Բենիամին Մաթևոսյանը կրկին չշտապեց կանխատեսումներ անել՝ նշելով, որ ավելի ճիշտ է սպասելը։

«Ես չեմ կարող գնահատական տալ, թե ինչ քայլերի կգնա ընդդիմությունը, ինչ որոշում կկայացնի, բայց վերլուծելով իրողությունները՝ ընդդիմությունը շատ բան կարող էր գիշերնն ուրվագծել։ Միգուցե կարող ենք այս իրավիճակը ձևակերպել որպես բաց թողնված հնարավորություն։ Սա է հայկական իրողությունը»,- ամփոփեց քաղաքագետը։