34 տարի առաջ այս օրը լիակատար ազատագրվեց Շուշին: Սկսելով ռազմական գործողությունը մայիսի 7-ի երեկոյան, 1700 խիզախ հայ մարտիկներ, գեներալ Արկադի Տեր-Թադևոսյանի հրամանատարությամբ, անհավանական գրոհով անակընկալի բերեցին անառիկ դիրքերում ամրացած, գերակշիռ ուժեր ունեցող թշնամուն, և ազատագրեցին ռազմավարական կարևորագույն նշանակություն ունեցող հայոց բերդաքաղաքը:
Սա հայոց զենքի առավել փառավոր հաղթանակներից էր վերջին հարյուրամյակի ընթացքում, և առհավետ ոսկե տառերով է գրվելու մեր պատմության մեջ: Ցավոք, մեր երկրում իշխանության եկած անհայրենիք թափառաշրջիկները վատնեցին այս փառահեղ հաղթանակը, սկուտեղի վրա Շուշին մատուցեցին թշնամուն՝ պատերազմը դրանով դադարացնելու ստահոդ և կեղծ հիմնավորմամբ:
Շուշին այսօր էլ մնում է անառիկ ամրոց, և ողջ Արցախի բանալին՝ Շուշիին տիրողն է միշտ վերահսկելու ողջ Արցախը: Համոզված եմ, որ մի օր մենք նորից մեր պայքարով, աշխատանքով և համախմբվածությամբ արժանի կդառնանք այդ պատվին, իսկ մինչ այդ հավերժ փառք տանք այն խիզախ հայ մարտիկներին, որոնք իրենց սխրագործությամբ 1992 թ. փրկեցին շրջափակումից հայկական Արցախը, և հաղթանակի բերկրանքը բերեցին մեր ողջ ժողովրդին:
Շնորհավոր բոլորիս Եռատոնը!
Ավետիք Չալաբյան, «Հայաքվե» ազգային քաղաքացիական միավորման համակարգող
