Խորապէս կը յայտնեմ խորին մտահոգութիւնս, զայրոյթս եւ համերաշխութիւնս Դավիթ Մինասյանին հետ, որ աւագ դպրոցի աւարտական դասարանի աշակերտ մըն է, ով անարդարօրէն կալանքի ենթարկուեցաւ այսօր, բան մը, որ յստակօրէն քաղաքական դրդապատճառներ կը պարունակէ։ Այս ժամանակաշրջանին, երբ ան պէտք է իր ուսումնառութեան մօտալուտ աւարտը տօնէր եւ պատրաստուէր վկայուելու, ան կը դիմագրաւէ մեղադրանքներ, որոնք նուազագոյնին մէջ՝ կասկածելի են եւ իրարու հակասող։ Աւելին, երիտասարդի մը իր աշակերտական տարիներու «Վերջին Զանգի» նախօրէին երբ ան արդար ուրախութեամբ պէտք է տօնէր զայն, փոխարէնը՝ ան զրկուած է իր ազատութենէն պետութեան մը կողմէ, որ կոչուած է պաշտպանելու զայն:
Բազմաթիւ վկաներ հաստատած են, որ Դավիթ Մինասյանը պատճառը չէ եղած այն իրադարձութիւններուն, որոնց համար զինքը կը մեղադրեն։ Այս վկայութիւնները, իր ձերբակալութեան շուրջ եղած անհամապատասխանութիւններուն կողքին, կը պահանջեն մանրակրկիտ, անաչառ եւ թափանցիկ քննութիւն մը: Արդարութիւնը չի կրնար հիմնուիլ լուրերու, քաղաքական ճնշումի կամ ընտրովի ճշմարտութեան վրայ։ Անիկա պէտք է հիմնուած ըլլայ ապացոյցի եւ արդարութեան վրայ. այն սկզբունքները, որոնք կը սահմանեն պետութիւն մը, որ նուիրուած է ժողովրդավարութեան եւ օրէնքի գերակայութեան: Երբ կառավարութիւն մը իր իշխանութեան գործիքները կ’ուղղէ երիտասարդ աշակերտի մը դէմ, այլ ոչ թէ կը պաշտպանէ ճշմարտութիւնն ու արդարութիւնը, անիկա կը բացայայտէ իր սեփական բարոյական ձախողութիւնը: Այլ խօսքով, իշխանութիւն մը, որ կը բանտարկէ խիղճը, չի կրնար օրինականութիւն ներկայացնել:
Հայաստանի իշխանութիւններուն. երիտասարդ աշակերտի մը հանդէպ ձեր վերաբերմունքը ենթադրեալ արարքներու համար, որոնք դեռ ամբողջովին ապացուցուած չեն, անարգանք կը բերէ արդարութիւնը պաշտպանելու համար ստեղծուած հաստատութիւններուն: Ձայն մը լռեցնելը, ճշմարտութիւնը փնտռելու փոխարէն, ուժի արարք մը չէ, այլ՝ վախի։ Անիկա կը մերկացնէ վախը այն սերունդէն, որ մարմնաւորումն է Հայաստանի ապագային։ Կառավարութեան մը իսկական ուժը երիտասարդութիւնը լռեցնելուն մէջ չէ, այլ անոնց լսելուն մէջն է: Իշխանութիւն մը, որ կը պատժէ իր երիտասարդութիւնը իր խղճի եւ հետաքրքրասիրութեան համար, կը քայքայէ իր օրինականութեան հիմքը:
Դավիթի մայրիկին՝ Գայանե Մինասյանին. Տիկին Մինասյան, գիտցէ՛ք, որ միայնակ չէք։ Ձեր դժուարութիւնը ներշնչած է շատերուն, թէ՛ Հայաստանի մէջ, թէ՛ աշխարհասփիւռ Հայաշխարհին մէջ:
Տիկին Մինասյան, դուք ծնած ու դաստիարակած էք զաւակներ, որոնց ազնուութիւնը, քաջութիւնը եւ բարոյական պարզութիւնը վկայութիւն են ձեր ուժին եւ արժէքներուն։ Դուք Հայ ժողովուրդին նուիրած էք ոչ միայն լաւ քաղաքացիներ, այլ նաեւ Հայաստանի ապագային խորհրդանիշ մը, որ հիմնուած է ճշմարտութեան եւ արդարութեան վրայ:
Այս անարդարութեան դէմ ցուցաբերած ձեր քաջութիւնը վեր ու անդին է ձեր անմիջական պայքարէն։ Իմացէ՛ք, որ դժուարութիւններու մէջ է, որ բնաւորութիւնը կը փորձուի, եւ հենց դժուարութեան միջոցով է, որ կը ծնի իսկական առաջնորդներու եւ սկզբունքային քաղաքացիներու յաջորդ սերունդը: Վստահ եղէք, որ այս հարցին մէջ. Ձեր հոգեհատոր Դավիթին եւ իր նմաններուն անունը յաւերժ պիտի մնայ իբրեւ դիմադրողականութեան, արժանապատուութեան եւ յոյսի խորհրդանիշ մը շատերու համար:
Վերջապէս, Կոչ կ’ուղղեմ Հայաստանի իշխանութիւններուն վերատեսութեան ենթարկելու դատարանի այս որոշումը, մանաւանդ, որ Դավիթ ունի նաեւ առողջական խնդիրներ, անյապաղ ազատ արձակելով Դավիթ Մինասյանին կամ, գէթ, ապահովելով օրէնսդրական նպատակային ընթացք մը, որ զերծ է քաղաքական դրդապատճառներէ եւ նկատի կ՛ունենայ իր առողջական վիճակը: Աշխարհը կը դիտէ, եւ արդարութիւնը աւելի քիչ բան չի պահանջեր:
Հայաշխարհը, իր միջոցաւ նաեւ միջազգային ընտանիքը ուշադրութեամբ կը հետեւի մեր Հայրենիքին մէջ կատարուածներուն, եւ պատմութիւնը պիտի արձանագրէ, թէ իւրաքանչիւրը ո՛ւր կանգնած էր՝ արդարութեա՞ն, թէ վախի կողմը։
Անվերապահ կերպով կը զօրակցիմ քեզ հետ Դավի՛թ՝ քաջ հայորդի, եւ շուտափոյթ ազատութիւն կը ցանկամ քեզ։
Յարգանքով եւ անսասան աջակցութեամբ,
ՍԵՒԱԿ ՅԱԿՈԲԵԱՆ
«Զարթօնք» Օրաթերթի
Գլխաւոր խմբագիր
ՅԳ. Վերջին եղելութիւններէն անտեղեակ, սոյն Բաց Նամակը կարդացողներուն յիշեցնեմ, որ Ծաղկազարդի օրը, որ կը խորհրդանշէ մեր Տէր Յիսուս Քրիստոսի խաղաղութեամբ Երուսաղէմ մուտք գործելու տօնը, Երեւանի Սուրբ Աննա եկեղեցի մուտք գործած Նիկոլ Փաշինեանի հետ պատահած միջադէպին մասնակից 18-ամեայ Դավիթ Մինասյանին հանդէպ, դատաւոր Մնացական Մարտիրոսեան, այսօ՛ր երկու ամիսով բանտարկելու որոշում կայացուց:
