Փաշինյանն այդքան շուտ է սկսել իր քարոզարշավը, որովհետեւ տիրապետում է իրական թվերին եւ տեսնում է, որ իրենք վերընտրվելու որեւէ հնարավորություն չունեն՝ «Հրապարակի» հետ զրույցում ասաց քաղաքագետ Ստեփան Դանիելյանը:
«Ի տարբերություն նախկին նախագահների, ինքն ուղղակի հնարավորություն չունի իշխանությունը կորցնելուց հետո ինչ-որ ձեւ հանգիստ ապրել Հայաստանում կամ Հայաստանից դուրս, այսինքն՝ սա իր համար կյանքի եւ մահու հարց է: Տեսնելով իրական թվերը, ինքն ուղղակի խուճապի մեջ է հայտնվել, եւ այն, որ մտնում է մետրո, տարբեր շրջաններ գնում, մարդկանց հետ ուզում է շփվել, ուղղակի փորձում է ինչ-որ ձեւ վերականգնել իր ինչ-որ վարկանիշ, այն վարկանիշը, որ ինքն ունեցել է 2018 թվականին կամ նույնիսկ 2021 թվականին: Հիմնական հնարքները հետեւյալն են․ ինքը հասարակ մարդ է եւ հասարակ մարդկանց շահերն է պաշտպանում եւ առաջ եթե խոսում էր թալանի մասին, հիմա ինքն ուզում է ասել՝ գիտեք, ես ձեզ նման պեռաշկի եմ ուտում:
Քանի հոգու վրա դա կաշխատի՝ ես չեմ կարող ասել: Ինքը վաստակաշատ հանգստի չի կարող գնալ, քանի որ չի կարող բազմաթիվ հարցերի պատասխանել: Կարծում եմ, ապրիլին իր վարկանիշն ավելի շատ կիջնի, ինչը խուճապ կառաջացնի իր թիմի մոտ, եւ ընտրություններին ընդառաջ հնարավոր է թիմը փլուզվի: Երկրորդը․ ինքը փորձում է 2021 թվականի տեխնոլոգիան օգտագործել՝ խաղաղության եւ պատերազմի, եթե դա այն ժամանակ մարդկանց վրա ազդում էր, ապա հիմա շատ գռեհիկ է ստացվում, եւ հասկանալի է, որ սա Ալիեւի հետ միասին համատեղ օպերացիա է կազմակերպել: Ինքն ասում է՝ պատերազմ կլինի, Ալիեւը սպառնում է, որ պատերազմ կլինի վեց ամսից հետո, եթե Հայաստանն իրեն ճիշտ չպահի, այսինքն՝ Ալիեւն է փորձում որոշել, թե ով Հայաստանում իշխանություն կլինի», – ասաց Դանիելյանը:
Քաղաքագետը նկատում է, որ այս՝ պատերազմով շանտաժը շատ գռեհիկ է, իր այս պահվածքը պանիկայի արտահայտություն է ու գնալով ինքն ավելի շատ սխալներ է թույլ տալու, ինչի հետեւանքով իր թիմը կսկսի հասկանալ, որ իրենից պետք է տարանջատվել, եւ յուրաքանչյուրը կփորձի իր հարցերը լուծել անջատ ու ավելի չմխրճվել այս անօրինականությունների մեջ, որն անում է գործող վարչապետ կոչվող այս անձը:
Պատերազմով շանտաժն Ալիեւի հետ պայմանավորված խաղ է, ըստ Դանիելյանի, Ալիեւին անհրաժեշտ է, որ Փաշինյանը վերարտադրվի, որ հետագայում զիջումներ լինեն, եւ միասին փորձում են վախի մթնոլորտ ստեղծել Ալիեւը հայտարարում է, որ այս պահին ճանաչում է Հայաստանի տարածքային ամբողջականությունը, բայց վեց ամիս հետո կարող է իր տեսակետը փոխել:
«Եվ սա այս միտքը վերցնում է, ասում է՝ սեպտեմբերին պատերազմ է լինելու, հոգեբանորեն ինքը փորձում է հիշեցնել 2020 թվականի սեպտեմբերի 27-ը, այսինքն՝ այս սեպտեմբերին նույնպես պատերազմ կլինի: Սա շանտաժ է, որովհետեւ Ադրբեջանը չի որոշում՝ Հայաստանի հետ պատերազմ կլինի, թե ոչ, ոչ էլ 2020 թվականին է Ադրբեջանը որոշել: Դա աշխարհաքաղաքական գործողություն էր, եւ Ադրբեջանին աջակցում էին Իսրայելը, Մեծ Բրիտանիան, Միացյալ Նահանգները, Պակիստանը եւ այլն։
Դա ուներ որոշակի նպատակ, եւ հենց իրենց աջակցության շնորհիվ կարողացավ Ադրբեջանը հաջողության հասնել, եւ նաեւ Հայաստանի գործող վարչախմբի շատ տարօրինակ գործողությունները, որը գուցե ապագայում պարզաբանվի հասարակությանը, թե դա ինչ էր նշանակում, ինչու ինքը պատերազմի տարավ Հայաստանը: Սա հերթական շանտաժն է, եւ այս գործող իշխանությունը, գործող վարչապետն այս շանտաժին գնում է»։
Ստեփան Դանիելյան, քաղաքագետ
