Mediamax-ի հրապարակած և, մասնավորապես, Նուբար Աֆեյանի, Էնթոնի Բարսամյանի, Լորդ Արա Դարզիի, Էրիկ Իսրայելյանի, Վաչե Մանուկյանի, Ժոզեֆ Օղուրլյանի, Բերժ Սեթրակյանի և Վահե Գաբրաշի կողմից ստորագրված հայտարարության կապակցությամբ, որը վերաբերում է Հայաստանի կառավարության և Հայ Առաքելական Եկեղեցու հարաբերություններին, Հայկական շարժումը կարևոր է համարում վերականգնել մի հիմնարար ճշմարտություն։ Այս մասին գրել է Ֆրանսիայի Հայկական շարժման նախագահ Ժակ Րաֆֆի Փափազյանը:
Նրա խոսքով՝ նշված ստորագրողները արտահայտում են իրենց անձնական դիրքորոշումը։
«Նրանք չունեն որևէ ժողովրդավարական մանդատ՝ խոսելու հայկական սփյուռքի անունից, որը բազմազան է, բազմաշերտ և քաղաքականապես անկախ։ Սփյուռքը չի սահմանափակվում միջազգային տնտեսական էլիտայով։ Հայաստանում ընթացող քննարկումը չի կարող խեղաթյուրվել։ Երբ Եկեղեցին անմիջականորեն ներգրավվում է կուսակցական քաղաքական դաշտում, նա դուրս է գալիս իր հոգևոր առաքելությունից և ստեղծում է ինստիտուցիոնալ լարվածություն։
Ցանկացած իրավական պետությունում կրոնական իշխանության և քաղաքական իշխանության տարանջատումը հիմնարար սկզբունք է։ Որևէ պատասխանատու կառավարություն չի հանդուրժի, որ կրոնական կառույցը երկարաժամկետ կերպով միջամտի քաղաքական պայքարին՝ առանց ինստիտուցիոնալ արձագանքի։
Հայ Առաքելական Եկեղեցին մեր ազգային ինքնության պատմական հիմնասյուներից է։ Հենց այդ պատճառով նա պետք է պաշտպանված լինի կուսակցական տրամաբանություններից և արտաքին աշխարհաքաղաքական ազդեցություններից, մասնավորապես՝ Կրեմլի հետ կապվող ազդեցության ցանցերից, որոնք ձգտում են ազդել Հայաստանի ներքին հավասարակշռությունների վրա։ Հայաստանի Հանրապետության ինքնիշխանությունը սակարկման ենթակա չէ։
Այն չի կարող պայմանավորվել ֆինանսական, խորհրդանշական կամ միջազգային ճնշումներով։ Հայկական շարժումը կոչ է անում վերադառնալ ինստիտուցիոնալ հստակությանը՝ Եկեղեցին կենտրոնացնելով իր հոգևոր առաքելության վրա, Պետությունը՝ սահմանադրական կարգի պահպանման երաշխավորի դերում, և Սփյուռքը՝ հարգված իր իրական բազմազանության մեջ»,- գրել է նա:
Հիշեցնենք՝ սփյուռքի մի խումբ հայ գործիչներ բաց նամակ են տարածել՝ Հայաստանի Կառավարության և Հայ Առաքելական Եկեղեցու միջև ընթացող հակամարտության վերաբերյալ՝ ընդգծելով Եկեղեցու ինքնակառավարման կարևորությունը, քաղաքական միջամտությունից խուսափելու անհրաժեշտությունը և սփյուռքի հայերի կրոնական իրավունքների պաշտպանության հրամայականը:
Այդ գործիչների թվում են Նուբար Աֆեյանը, Էնթոնի Բարսամյանը, Լորդ Արա Դարզին, Էրիկ Էսրայելյանը, Վաչե Գաբրաշը, Վաչե Մանուկյանը, Ջոզեֆ Ուղուրլյանը և Պերճ Սեդրակյանը:
Նիկոլ Փաշինյանն անդրադարձել էր սփյուռքահայ գործիչների ստորագրած նամակին։
Վարչապետը պնդել է, թե ընթացող գործընթացների իրական նպատակը կաթողիկոսությունը Հայաստանից դուրս հանելն է։
Հայտարարությանն արձագանքել էր նաև «Հայաստանի մանուկներ» բարեգործական հիմնադրամի (ՔՈԱՖ) հիմնադիր և խորհրդի նախագահ Գարո Արմենը՝ նշելով, որ Փաշինյանի ղեկավարած կառավարությունը որդեգրել է դժվար, ոչ կատարյալ, սակայն կենսունակ ուղի՝ ամրապնդել պետական ինստիտուտները։
