Գյումրիի ավագանիում ՔՊ-ն ունի 14 մանդատ, իսկ ընդդիմադիր ուժերը միասին՝ 19 մանդատ. Մեծամասնություն ունենալու համար պետք է 17 մանդատ, այսինքն ՔՊ-ին չի հերիքում 3 մանդատ։ Այս մասին այսօր լրագրողների հետ զրույցում հիշեցրեց ԱԺ «Պատիվ ունեմ» խմբակցության պատգամավոր Մարտուն Գրիգորյանը՝ պատասխանելով հարցին, թե որքանով է հնարավոր, որ ՔՊ-ն կարողանա Գյումրիում քաղաքապետ ունենալ։
Լրագրողները հետաքրքրվեցին՝ ինքը բացառո՞ւմ է, որ իրենց խմբակցությունից որևէ մեկը կմիանա ՔՊ-ին, նա պատասխանեց՝եթե քաղաքապետի թիմի նկատմամբ ճնշումներ սկսվել են վերջերս, իմ թիմի նկատմամբ ճնշումները եղել են ընտրությունների հենց հաջորդ օրվանից։
Հարցին՝ ստեղծված իրավիճակում ո՞րն է լավագույն սցենարը, Մարտուն Գրիգորյանը պատասխանեց.
«Պիտի ուշադիր լինենք, զգոն լինենք, պիտի ամեն րոպե այս մասին խոսենք։ Այս մարդկանց ուզածը ի՞նչ է. մեկից ստացան «կաշառակերի» տարբերակը, ինձնից էլ փորձելու են ստանան կրիմինալը, կռիվ, ծեծ ու ջարդեր՝ դրանից բխող մնացած հետևանքներով»։
Հաջորդ հարցին՝ ինքը Վարդան Ղուկասյանին քաղհալածյալ համարո՞ւմ է., Մարտուն Գրիգորյանը պատասխանեց.
«Երևի դրա մասին ավելի շատ դուք պիտի ներկայացնեք՝ քաղհալածյալ է, թե քաղհալածյալ չէ։ Բայց այն, որ քաղաքապետը ընտրվելուց հետո այս իրավիճակում արդեն ձերբակալված է, դա էլ անմեղության կանխավարկածը կա։
Մենք նմանատիպ ձայնագրություններ բազմիցս լսել ենք ու տեսել ենք, որը հետագայում պարզվել է, որ մեկը կտրված էր կոնտեքստից, մեկը չգիտեմ ինչ էր եղած։ Ես հստակ այս առումով ոչ մի բան չեմ կարող ասել, քանի որ փաստը չկա։ Եթե փաստը լինի վերջնական, լինի, որ իրականություն է այս ամեն ինչը, բնականաբար քաղալածյալ չէ, իսկ եթե պարզվի, որ սարքած, կցած-կցմցած, ինչ-որ բանով սարքած-կարած գործ է, այդ պարագայում արդեն պարզ է»։
