ArmLur.am-ի տեղեկությունների համաձայն՝ վաղ առավոտից հոգևորականների ձերբակալության և նրանց տներում խուզարկեւթյունների պատճառը «Իրազեկ քաղաքացիների միավորում» հասարակական կազմակերպության ծրագրերի համակարգող Դանիել Իոաննիսյանի հաղորդումն է եղել։
Բանն այն է, որ Իոաննիսյանի հաղորդման պատճառ է դարձել Տեր Արամ քահանա Ասատրյանի հրապարակումը։
Հովհաննավանքի հոգևոր հովիվ Տեր Արամ քահանա Ասատրյանը տեսանյութ է հրապարակել, որում խոսում է այն մասին, թե երբ են իր նկատմամբ սկսվել հալածանքները: Տեսանյութով նա հերքել է նաև այն պնդումները, թե ասել է, որ իբր ինքը վանքում կդիմավորի Ալիևին:
Ըստ հոգևորականի՝ 2024 թվականին առանց որևէ մեկին զգուշացնելու՝ 42 կնոջ հետ, որոնք եղել են զոհվածների և գերեվարվածների հարազատներ, վարչապետի տիկին Աննա Հակոբյանը գնացել է Հովհաննավանք և քահանային խնդրել պատմել կառույցի մասին: Վերջինս արել է դա, որից հետո ըստ նրա՝ իր նկատմամբ սկսվել են հալածանքներ:
«Էս վանքն իմ տունն է և Աստծո տունն է, ով էլ գա ասի՝ Տիրոջ տան պատմությունը պատմիր, ես պետք է պատմեմ, եթե Ալիևն էլ գա ասի՝ պատմիր, ես պետք է պատմեմ՝ նրան ցույց տալու համար, որ 13-րդ դարում հայն ու այս վանքը եղել են: Իմ անելիքն է սպասարկել բոլորին»,- ասել է նա:
