Գեղարքունիքը, որտեղ Փաշինյանը հեծանվավազքի էր մասնակցում, 3 տարի առաջ ունեցել է բազմաթիվ զոհեր, այդ թվում՝ դաժանորեն սպանված կին զինծառայողներ

«Խաղաղության պատրանք՝ հեծանիվ վարելով» վերնագրի ներքո քաղաքագետ, «Դեմոկրատական այլընտրանք» կուսակցության նախագահ Սուրեն Սուրենյանցն անդրադարձել է Հայաստանի նկատմամբ ադրբեջանական ագրեսիայի 3-րդ տարելիցին Փաշինյանի առաջնորդած հեծանվավազքի մրցաշարին։

Սուրենյանցը նկատել է.

 Նիկոլ Փաշինյանը ժպիտը դեմքին Սևանում մասնակցել է «ՀՀ վարչապետի գավաթ» հեծանվավազքին, հպարտացել է, թե 40 կմ է անցել աշակերտների հետ։

Բայց նույն Գեղարքունիքը երեք տարի առաջ ադրբեջանական սեպտեմբերյան ագրեսիայի հետևանքով տվել է բազմաթիվ զոհեր․ այդ թվում դաժանաբար սպանվեցին կին զինծառայողներ՝ հենց այս մարզի բնակիչներ։

Ադրբեջանը մինչ օրս օկուպացված է պահում Հայաստանի տարածքներ, այդ թվում՝ Գեղարքունիքում։

Փաշինյանը լռեց։

Չհիշատակեց ո՛չ օկուպացված հողերը, ո՛չ էլ մեր զոհված հերոսներին։

Չդատապարտեց Ադրբեջանի ագրեսիան։

Նույնիսկ մի նախադասությամբ չփորձեց ամոքել Հայաստանի, Գեղարքունիքի ցավը։

Փոխարենը՝ նա ստեղծում է խաղաղության պատրանք՝ հեծանիվ վարելով։

Սա ոչ թե խաղաղություն է, այլ ադրբեջանական վասալիտետի ընդունում։

…Ափսոս էին այն երիտասարդները, ովքեր նահատակվեցին հանուն Հայաստանի Հանրապետության։