ԱՄՆ նախագահ Դոնալդ Թրամփը երեքշաբթի կոչ է արել ԵՄ պաշտոնյաներին Չինաստանի նկատմամբ մինչև 100% մաքսատուրքեր սահմանել ՝ որպես Ռուսաստանի նախագահ Վլադիմիր Պուտինի վրա ճնշում գործադրելու ռազմավարության մաս. գրում է Reuters-ը։
Թրամփը նաև խրախուսել է Եվրամիությանը Հնդկաստանի նկատմամբ նմանատիպ լայնածավալ մաքսատուրքեր կիրառել, ասել է պաշտոնյան, որը խնդրել է անանուն մնալ։
Չինաստանը և Հնդկաստանը ռուսական նավթի խոշոր գնորդներ են և կենսական դեր են խաղում Ռուսաստանի տնտեսությունը պահելու գործում։
Թրամփը խնդրանքը, որը փոխանցվել է հեռախոսազրույցի միջոցով, ներկայացրել է ԵՄ պատժամիջոցների գծով դեսպան Դեյվիդ Օ’Սալիվանին և ԵՄ այլ պաշտոնյաների: ԵՄ պատվիրակությունն այժմ գտնվում է Վաշինգտոնում՝ պատժամիջոցների համակարգումը քննարկելու համար:
Եթե ԱՄՆ խնդրանքը հաշվի առնվի, կհանգեցնի ԵՄ ռազմավարության փոփոխության, որը նախընտրել է Ռուսաստանին մեկուսացնել պատժամիջոցներով, այլ ոչ թե մաքսատուրքերով։
Չինաստանը կտրականապես դեմ է ԱՄՆ-ի կողմից այսպես կոչված տնտեսական ճնշման կիրառմանը, չորեքշաբթի օրը կայացած մամուլի ասուլիսում հայտարարել է Չինաստանի արտաքին գործերի նախարարությունը՝ հավելելով, որ ինքը նաև դեմ է Չինաստանին Ռուսաստանի վերաբերյալ քննարկումներում օգտագործելուն։
Թրամփը, որի խնդրանքի մասին առաջին անգամ հաղորդել էր Financial Times-ը, հաճախ է սպառնացել մաքսատուրքեր սահմանել Հնդկաստանի և Չինաստանի նկատմամբ՝ որպես պատիժ ռուսական նավթի գնման համար։
Թեև Թրամփը ամռանը Հնդկաստանի նկատմամբ մաքսատուրքերը բարձրացրեց 25 տոկոսով՝ մասամբ Կրեմլի հետ նրա տնտեսական հարաբերությունների պատճառով, բայց դեռևս չի կիրառել իր առաջարկած ավելի խիստ տարբերակները։
Ժամանակ առ ժամանակ նա բողոքել է, որ Եվրոպան լիովին չի անջատվել Ռուսաստանից, որը անցյալ տարի մատակարարել է ԵՄ գազի ներմուծման մոտ 19%-ը, չնայած դաշինքը հայտարարում է, որ հանձնառու է լիովին վերացնելիր կախվածությունը ռուսական էներգիայից։
Երեքշաբթի՝ ավելի ուշ, Թրամփը ենթադրեց, որ ԱՄՆ-ն կարող է իրականում խթանել առևտուրը Հնդկաստանի հետ՝ երեկոյան սոցիալական ցանցերում գրելով, որ ԱՄՆ-ն և Հնդկաստանը աշխատում են երկրների միջև առևտրային խոչընդոտները վերացնելու ուղղությամբ: Նա հավելեց, որ անհամբեր սպասում է Հնդկաստանի վարչապետ Նարենդրա Մոդիի հետ հանդիպմանը:
