Հայերը Ադրբեջանի տարածքը լքելու որոշումը կայացրել են ինքնուրույն. գերմանական «Berliner Zeitung» հրատարակությանը տված հարցազրույցում ասել է Ադրբեջանի նախագահի օգնական Հիքմեթ Հաջիևը։
«Նախ, մենք հայերին չենք վտարել Ղարաբաղից։ Նրանք իրենք են որոշում կայացրել հեռանալ։ Երկրորդ. Ադրբեջանը պատրաստել է բավականին համապարփակ վերաինտեգրման ծրագիր, բայց հայերը մերժել են այն։ Ի՞նչ է նշանակում այս ծրագիրը։ Ադրբեջանի քաղաքացիության ընդունում, Ադրբեջանի քաղաքացիների հետ հավատարմության հիմունքներով ապրել՝ Ադրբեջանի Հանրապետության Սահմանադրության և օրենքների շրջանակում։ Սա բացարձակապես նորմալ է ցանկացած պետության համար։ Այս հարցը փակված է։ Նրանց համար, ովքեր ցանկանում են ապրել որպես Ադրբեջանի քաղաքացիներ, կան համապատասխան ընթացակարգեր»,-ասել է Հաջիևը։
Ադրբեջանցի պաշտոնյան նշել է, որ ինքը համաձայն չէ «ղարաբաղցի հայերի՝ այս տարածքից հեռանալը որպես էթնիկ զտում մեկնաբանության հետ»։
