«Հրապարակ» թերթը գրում է. «Նիկոլ Փաշինյանը թեպետ օրեր առաջ հրապարակեց Եկեղեցու դեմ գործողությունների ծրագիր, որով պատրաստվում է ոչ միայն կաթողիկոսին փոխել, այլև Հայ առաքելական եկեղեցու կանոնագիրքը, սակայն թիմում չեն ուզում հավատալ Վեհարանը գրոհելու ծրագրին։ Ոմանք նույնիսկ Էջմիածնի հրապարակում «հոգևոր հավաք» անելուն են կասկածում, որը, ըստ որոշ տեղեկությունների, պետք է տեղի ունենա այսօր կամ վաղը։ Ասում են, որ Փաշինյանի հույսը Վեհափառի վախն է։ Թիմում ոմանք նույնիսկ տարակուսած են՝ Փաշինյանը մի կողմից կաթողիկոսին մեղադրում է Եկեղեցու կանոնագիրքը, կուսակրոնությունը խախտելու համար, բայց օրեր առաջվա իր ծավալուն գրառման մեջ մի ամբողջ շարք պնդումներ է անում, որոնք հակասում են Հայ առաքելական եկեղեցու ներկայիս կանոններին։
Դիցուք՝ ասում է, թե կաթողիկոսին Վեհարանից հեռացնելու և փիլոնազրկելու պարագայում կաթողիկոսական տեղապահը կլինի որևէ ամուսնացյալ քահանա, որը չի հավակնի կաթողիկոսի դերին։ Եկեղեցական կանոնով՝ քահանան տեղապահ չի կարող լինել, և, ընդհանրապես, տեղապահ նշանակում են այն դեպքում, եթե կաթողիկոսը գահից հրաժարվում է կամ վախճանվում։ Տեղապահի նկատմամբ էլ գործում են նույն պահանջները, ինչ կաթողիկոսի։ Նա պետք է լինի եպիսկոպոս և չամուսնացած»։
