Քաղաքագետ Սուրեն Սուրենյանցը գրում է. «Ազգային ժողովի նախագահ Ալեն Սիմոնյանը կարծում է՝ Ալիևի պահանջած՝ «արևմտյան ադրբեջանցիների» վերադարձի մասին հայտարարությունները Ղարաբաղի ներկայացուցիչների քայլերի հայելային պատասխանն են:
«Դե մենք էլ ենք չէ՞ տարածքային պահանջ բան անում, չէ՞, երբ որ, օրինակ, Ղարաբաղի ներկայացուցիչները նոր, ինչ-որ, նախագահ են ընտրում իրանց համար, հետո ինչ-որ հայտարարություններ են անում: Մենք էդ չենք նկատում, բայց դրան ի պատասխան Ադրբեջանի արած քայլերը, ասում ենք՝ տեսա՞ք ինչ ասեց», – այսօր լրագրողների հետ զրույցում հայտարարել է ԱԺ նախագահը:
Ալեն Սիմոնյանի հայտարարություններն անամոթություն են, եթե նույնիսկ ինձ պես շատերը ռացիոնալ չեն համարում Հայաստանում Արցախի պետական մարմինների պահպանումը:
Ալեն Սիմոնյանի շեֆը՝ Նիկոլ Փաշինյանը, դեռ 2022թ-ի հոկտեմբերի 6-ին, Պրահայում, ԼՂ-ն ճանաչել է ունիտար Ադրբեջանի մաս՝ դրանով փակելով ԼՂ հակամարտության էջը:
Բայց դրանից հետո ավելի մեծ ուժգնությամբ Բաքվում խոսել են «Արևմտյան Ադրբեջանի» մասին, ընդ որում՝ պետական ամենաբարձր մակարդակով:
Բաքվի ագրեսիվ օրակարգը ոչ թե արցախցիների գործողություններ, այլ Նիկոլ Փաշինյանի քաղաքականության և 44-օրյա պատերազմի հետևանքն են:
Եթե Ալեն Սիմոնյանը փորձում է «մեղավոր» կարգել արցախցիներին, ապա դա մեկ անուն ունի. նա փորձում է պատասխանատվությունը ագրեսոր Ադրբեջանի ուսերից դնել զոհի՝ արցախցիների ուսերին, այլ խոսքով՝ սպասարկում է Բաքվի օրակարգը:
Հենց այդպես են դառնում կոլոբորանտ իշխանություն, Բաքվի «դեսանտ» Հայաստանում»:
