Եգիպտական բանակից մինչև ադրբեջանական՝ 11.500 զինվորական է այսօր անցել Մոսկվայի Կարմիր հրապարակով՝ որպես Հայրենական մեծ պատերազմում հաղթանակ տարած ազգային գվարդիաների հետնորդներ ու այդ հաղթանակի կրողներ։
Տարածքով ու ազգաբնակչությամբ փոքր Հայաստանը ամենամեծ մասնակցությունն է ունեցել Մեծ հայրենականին. 600. 000 զինվոր է տվել, 300. 000-ը չի վերադարձել։ 5 մարշալ ենք տվել պատերազմին, որոնցից 4-ը՝ արցախցի, 177 գեներալ։ 67 000 հայ արժանացել է շքանշանների, 170-ը` Խորհրդային Միության Հերոսի կոչման։
89-րդ «Թամանյան» դիվիզիան մտել է Բեռլին, մասնակցել վերջին ճակատամարտին, հաղթել ու հաղթական Քոչարի պարել։
Մեծ հաղթանակն իր արյամբ ամենաշատը հայ ժողովուրդն է կերտել, ու հիմա այդ Հաղթանակի 80-ամյակի տոնակատարությանը Կարմիր հրապարակում Հայաստանը չկա, հայոց բանակի զինվորները չկան։ Հայկական զորախումբը ներկայացուցչական քայլերթով չանցավ Կարմիր հրապարակով։
Հայաստանի կողմից ու Հայաստանի անունից Մեծ հաղթանակի 80-ամյակի տոնակատարությանը մասնակցեց Նիկոլ Փաշինյանը։
Երեկվանից ռուսական լրատվամիջոցները հրապարկում են տեսանյութեր ու լուսանկարներ՝ Փաշինյանը մեկուսի նստած, Փաշինյանի հետ մի կերպ են շփվում։ Արհամարհված, ոչնչացված, անուշադրության մատնված, նսեմացված… Բայց նա՛ է ներկայացնում Հայաստանը, նա՛ մեր երկրի ներկայացուցիչն է, ասել է թե՝ խորհրդանիշը, հավաքական կերպարը։
Մենք հաղթել ենք արաբներին, մոնղոլ-թաթարներին, սելջուկ-թուրքերին, վաչկատուն ցեղերին, թուրքերին, ադրբեջանցիներին, այո՛, հաղթել ենք, եթե հաղթած չլինեինք, գիշատիչ-հարևաններով շրջապատված լինելով հանդերձ՝ Հայկական 2 պետություն չէինք ունենա, 21-րդ դար չէինք հասնի։
Բայց այսօր պարտվում ենք մեկին, որը Հայաստանն է ներկայացնում Կարմիր հրապարակում, Մոսկվայում, Պրահայում, Վաշինգտոնում, Բեռլինում և այլուր։
Ալիևը չի մասանակցել Մեծ հաղթանակի տոնակատարությանը, Մոսկվա չի մեկնել, բայց Կարմիր հրապարակով անցավ նաև ադրբեջանական զորախումբը։
Փաշինյանն ի՞նչ զգաց, երբ ադրբեջանական զորախումբն անցավ, իսկ հայական զորախումբը չկար, հետը չէր տարել. նրա մամուլի խոսնակն էլ այսօր հայտարարել է՝ նպատակահարմար չենք համարել հայկական զորախումբ ուղարկել Մոսկվա։
Նպատակահարմար չե՞ք համարել, թե ռիսկ չեք արել…
Բացառվա՞ծ է, որ հենց Ալիևը հրահանգած լինի՝ Կարմիր հրապարակով ոչ մի հայ զինվոր չի անցնելու, ՀՀ դրոշը չի ծածանվելու։
Իհարկե, բացառված չէ՝ դատելով մինչ այժմ Բաքվից Երևան հասած հրահանգների, պահանջների անխափան ու սիրահոժար իրագործումներից՝ ի վնաս Հայաստանի ու հայ ժողովրդի ազգային-պետական շահերի։
