Իսրայելի ոստիկանությունը ուժ է կիրառել հայ ուխտավորների նկատմամբ (տեսանյութ)
Յակոբ Ճռնազեանը գրում է.
«Եկել է ժամանակը, որ Երուսաղեմի եկեղեցիների և քրիստոնեական համայնքների ղեկավարները Սուրբ կրակն իրենց ձեռքը վերցնեն։
Այն, ինչ այսօր ծավալվեց, չի կարելի տոն անվանել՝ դա նվաստացման և ագրեսիայի օր էր։
Սուրբ Գերեզման եկեղեցուց և շրջակայքում գտնվող քրիստոնեական ու հայկական թաղամասերից տեսարաններն ուղղակի սարսափելի էին:
Իսրայելի ոստիկանությունը քրիստոնյա հավատացյալներին՝ երեխաներին, կանանց, հոգևորականներին և ուխտավորներին վերաբերվել է բռնությամբ, անհարգալից վերաբերմունքով և մարդկային արժանապատվության տարրերի նկատմամբ կատարյալ անտեսմամբ:
Սրբազան արարողության փոխարեն մենք դարձանք ռազմականացված գոտու վկաներ։ Ուրախության փոխարեն վախ տեսանք։
Սա առաջին անգամը չէ, բայց պետք է լինի վերջինը։
Իսրայելի ոստիկանության կիրառած անօրինական սահմանափակումներն ու դաժան միջոցները ուղղակի հարձակում են մեր քաղաքում ազատ երկրպագության իրավունքի վրա։ Սուրբ կրակի արարողությունը՝ քրիստոնեության ամենասուրբ ավանդույթներից մեկը, վերածվում է մարտի դաշտի։
Եկեղեցիների պետերը, որպես մեր սրբավայրերի պահապաններ, պետք է պահանջեն անհապաղ վերջ դնել ոստիկանության այս խայտառակ գործողություններին՝ Եկեղեցում և մեր թաղերում։
Սա մեր Եկեղեցին է, մենք այս քաղաքի զավակներն ենք և պետք է պայքարենք մեր իրավունքների համար:
Մեր ներկայությունը դիմադրություն է։ Մեզ չեն վտարի։ Քրիստոսի լույսը հնարավոր չէ մարել»:
