«Ազգի» փետրվարի 7-ի համարում հարցազրույց էինք հրապարակել «Եվրոպա Նոստրայի» ավստրիացի անդամ, հայագետ Յասմին Դում-Թրագութի հետ, որ մեր զրույցում հույս էր հայտնել, թե Եվրոպայի 14 ամենավտանգված ժառանգության վայրերի կարճ ցանկում հայտնված Տավուշի Առաքելոց վանական համալիրը եւ գյուղատեղին մարտի 18-ի քվեարկության ժամանակ հնարավոր է ընդգրկվի 7 ամենավտանգված հուշարձանների շարքում: Քիչ առաջ հայտնի դարձավ հայերիս համար ուրախալի լուրը:
Եվրոպական ներդրումային բանկն է ֆինանսավորում նորոգումը եւ չափազանց կարեւոր է, որ սահմանամերձ բնակավայրում գտնվող հուշարձանն է արժանանում նման հոգատարության:
«Եվրոպա նոստրայի» համար հուշարձանի պոտենցյալը կարեւոր է: Իսկ Առաքելոցինը շատ մեծ է: Նախ՝ ահագին մեծ հուշարձանախումբ է, միայն իմ ցանկում 21 հուշարձան կա: Ինձ համար կարեւոր է որ Առաքելոցը ներկայացնեմ, առաջինը՝ որպես սահմանամերձ գյուղի մի շատ կարեւոր մշակութային ժառանգություն եւ, իհարկե, որպես պատմության հին վկա: Առաքելոցը շատ հետաքրքրական է այն առումով նաեւ, որ յուրօրինակ գյուղ է եղել, խիտ անտառում, գետի մոտ, այն ժամանակին մետաքսի ճանապարհի մի շատ կարեւոր կենտրոն է եղել: Առաքելոցի պատմությունը հետաքրքրական է, վանքն էլ քիչ հետազոտված է: Կարեւոր կլինի նաեւ, որ տարածքի ժողովուրդը հասկանա՝ ի՛նչ գանձեր ունի լքված հին բնակատեղիներում, եւ որ բնակիչներն էլ սովորեն իրենց պատմությունը:
Ես՝ հայագետս պիտի ամեն ինչ անեմ, որ Ավստրիայում, գերմանախոս երկրներում եւ ամբողջ Եվրոպայում իմանան եւ հասկանան, թե ի՞նչ է նշանակում հայ մշակութային ժառանգություն: Առաքելոցն ինձ եւ բոլորին հրաշալի հնավորություն կտա, եթե շահի», փետրվարին հրապարակված մեր զրույցում ասել էր Յասմին Դում- Թրագութը:
Նրա աշխատասիրության, նվիրվածության, ահռելի ջանքերի, գիտելիքի եւ ամենակարեւորը՝ չհանձնվելու որոշմամբ է նաեւ պայմանավորված այս ձեռքբերումը:
Շնորհավորում ենք, սիրելի Յասմին Դում-Թրագութ:
Շնորհակալ ենք:
ԱՆԱՀԻՏ ՀՈՎՍԵՓՅԱՆ, Գերմանիա
Կարդացեք նաև՝ Դում-Թրագութ. «Իհարկե շատ կարեւոր է, որ Առաքելոցը սահմանամերձ գյուղում է գտնվում»
Հետևեք մեզ նաև Տելեգրամում։
