Գրեթե անմիջապես շատ եվրոպացի քաղաքական գործիչներ հանդես են եկել Ուկրաինային աջակցող հայտարարություններով։
Բանակցությունների ձախողմանը առաջիններից մեկը արձագանքեց Լեհաստանի վարչապետ Դոնալդ Տուսկը։ «Նախագահ Զելենսկի, Ուկրաինա, դու մենակ չես»,- գրել է նա Facebook-ի իր էջում։
«Ուկրաինա, Իսպանիան քեզ հետ է»,- գրել է Իսպանիայի վարչապետ Պեդրո Սանչեսը։
«Այս պատերազմի ագրեսորը Ռուսաստանն է, և մենք այս ամբողջ ընթացքում ճիշտ ենք արել՝ օգնելով Ուկրաինային և պատժամիջոցներ սահմանելով Ռուսաստանի դեմ, և մենք կշարունակենք դա անել։ Մենք պետք է հարգենք նրանց, ովքեր կռվել են պատերազմի հենց սկզբից», – AFP-ն մեջբերում է Ֆրանսիայի նախագահ Ֆրանսուա Մակրոնի խոսքերը
Ըստ Գերմանիայի արտաքին գործերի նախարար Անալենա Բերբոքի՝ «Ուկրաինան կարող է հույս դնել Գերմանիայի, Եվրոպայի և այլ երկրների անսասան աջակցության վրա։ Ժողովրդավարության նրանց պաշտպանությունը և խաղաղության ու անվտանգության ձգտումը նույնպես մեր խնդիրն է»։
Գերմանիայի Քրիստոնեա-դեմոկրատական միություն կուսակցության փոխնախագահ Յոհան Վադեպոլը ևս աջակցել է Կիևին։ «Սպիտակ տնից տեսարանները ցնցող են։ Ինչպե՞ս կարելի է գրավված երկրի նախագահի թիկունքից այդպես դանակ խրել։ Ազատ Եվրոպան չի դավաճանի Ուկրաինային», – գրել է նա:
«Երբեմն դիվանագիտությունը դժվար հանգամանքներում անհնարինի արվեստն է: «Ուկրաինա, Լատվիան ձեզ հետ է»,- հայտարարել է Լատվիայի նախագահ, արտաքին գործերի նախարարության նախկին ղեկավար Էդգարս Ռինկևիչսը։
ԱՄՆ-ում բանակցությունների ձախողման արձագանքները տարբեր են՝ կախված քաղաքական գործիչների կուսակցական պատկանելությունից։
Զելենսկին իր պահվածքով «ոչնչացրել է» իրեն ամերիկացիների աչքում, ասել է Թրամփի մերձավոր դաշնակիցը՝ կառավարության արդյունավետության դեպարտամենտի ղեկավար Իլոն Մասկը։
Թրամփն ու Վենսը «կատարում են Պուտինի կեղտոտ գործը». ասել է դեմոկրատ սենատոր Չակ Շումերը՝ նկարագրելով երկու նախագահների հանդիպման արդյունքները և խոստացել, որ «Սենատում դեմոկրատները երբեք չեն դադարի պայքարել ազատության և ժողովրդավարության համար»։
Կալիֆոռնիայի նահանգից սենատոր Ադամ Շիֆն էլ ավելի կոպիտ արտահայտվեց. «Այսօր Օվալաձև սենյակում հանդիպեցին մի հերոս և վախկոտ: Երբ պատերազմն ավարտվի, հերոսը կվերադառնա Ուկրաինա»։
Վլադիմիր Պուտինի օգնական, RDIF-ի ղեկավար Կիրիլ Դմիտրիևը, ով Սաուդյան Արաբիայում մասնակցել է ԱՄՆ-Ռուսաստան վերջին բանակցություններին, կարճ մեկնաբանել է Թրամփի և Զելենսկու՝ Օվալաձև աշխատասենյակում վիճելու տեսանյութը. «Սա պատմություն է»։
BBC News
