Անասնաբույժների ասոցիացիայի նախագահ Արման Օհանյանը չի շտապում մասնագիտական կարծիք հայտնել և մատնաշել այն ռիսկերը, որոնք կարող են առաջանալ անասնաբուժական մարզային լաբորատորիաների հավանական փակման հետևանքով։ Նա առաջնային կերպով ցանկանում է իմանալ՝ ում մոտ է լաբորատորիաների փակելու միտքը հղացել։
«Նախ չգիտեմ՝ ինչ արգումենտներով են հասկացել, որ այդ լաբորատորիաները չեն աշխատում կամ ճիշտ չեն աշխատում կամ դրանք ընդհանրապես պետք չեն մեզ։ Առաջին հերթին ես ուզում եմ այդ կարծիքը տվող մարդկանց լսել և հասկանալ՝ ինչի հիման վրա է այս կարծիքը ձևավորվել։ Երբ որ բոլորը կհավաքվեն, ես էլ իմ խոսքը կասեմ և իմ կարծիքը կհայտնեմ՝ ոնց եմ պատկերացնում առանց մարզային լաբորատորիայի։ Կամ միգուցե շտկվե՞ին ինչ-որ որոշակի բաներ, ոչ թե միանգամից փակվեին։ Սա իմ կարծիքն է»,- ասաց մեր զրուցակիցը։
Հարցին՝ ի՞նչ վտանգներ է տեսնում մարզային անասնաբուժական լաբորատորիաների փակման դեպքում Արման Օհանյանը կրկին խուսափեց ուղիղ պատասխան տալ, միայն նշեց, որ վտանգներ է տեսնում անասնաբույժների թվաքանակի կրճատման մեջ։
«Սերնդափոխության հարց կա, այ դա ամենամեծ վտանգն է»,- նշեց Անասնաբույժների ասոցիացիայի նախագահը։
Կրկին հետաքրքրվեցինք՝ իր՝ փորձառու անասնաբույժի կարծիքով որո՞նք են ռեալ ռիսկերը, որ կարող են առաջանալ, եթե մարզային լաբորատորիաները փակվեն։ Ի պատասխան՝ մեր զրուցակիցն ընդգծեց, որ գնահատական տալու համար գոյություն ունեն պետական կառույցներ, պետք է նրանք պարզաբանումներ ներկայացնեն։
«Ո՞նց են պատկերցնում կապը մարզից, գյուղից միանգամից միակ լաբորատորիա։ Դա պետք է որոշողներն ասեն, ես չեմ ասելու. ես դեռևս ուզում եմ լսել։ Միգուցե ձևեր կան՝ ե՞ս չգիտեմ։ Ուզում եմ հասկանամ՝ որն է այդ որոշման հիմքը, միգուցե հավաքվենք, այդ մարդկանց լսենք։ Կարող է՝ իրենք ունեն հստակ պատկերացում»,- նշեց Անասնաբույժների ասոցիացիայի նախագահ։
Արման Օհանյանը միաժամանակ նշեց, որ ինքը և շատ այլ անասնաբույժներ աշխատել և աշխատում են դաշտային պայմաններում, սակայն մշտապես օգնություն են ստացել այն պետական կառույցներից, որոնց մեջ էլ ընդգրկված են մարզային անասնաբուժական լաբորատորիաները։
Դիտարկմանը, որ կարծես չի ուզում խոսել լաբորատորիաների փակմանը հետևող վտանգների մասին, կամ կրավորականկեցվածք է որդեգրել մեր զրուցակիցը պատասխանեց՝ ոչ թե վախենում է կամ չի ուզում խոսել, այլ ուզում է հասկանալ՝ ո՞րն է եղել լաբորատորիաների փակման դրդապատճառը։
«Միգուցե որ ասում են փակենք՝ մարդիկ գիտե՞ն դրա հետագա լուծումները։ Միգուցե կան, բայց ես չեմ պատկերացնում»,- ամփոփեց Արման Օհանյանը։
Նշենք, որ ըստ մամուլում շրջանառվող լուրերի՝ նախագիծ է շրջանառում` փակելու անասնաբուժական մարզային լաբորատորիաները։
