ՀՀ աշխատանքի և սոցիալական հարցերի նախարարության աշխատանքի և զբաղվածության վարչության պետ Ժորա Սարգսյանը հայտնել է, որ 2026 թվականի հունվարի 1–ից Հայաստանում բոլոր աշխատանքային պայմանագրերը պարտադիր պետք է կնքվեն էլեկտրոնային համակարգով։ Նա հիշեցրել է, որ օրենսդրական այդ փոփոխություններն ընդունվել են 2024թ. դեկտեմբերին՝ ԱԺ-ում։
Ըստ այդմ, այս տարվա հուլիս 1–ից աշխատանքային պայմանագրերն էլեկտրոնային տարբերակով կնքելու պահանջը կգործի կամավորության սկզբունքով, իսկ հաջորդ տարվանից այն կդառնա պարտադիր։
«Պետական եկամուտների կոմիտեի հարթակում լինելու է պորտալ, որտեղ մուտք են գործելու գործատուները։ Նրանք լրացնելու են աշխատանքային պայմանագրի պարտադիր դաշտերը։ Բացի դրանից, գործատուն կարող է աշխատողի հետ համաձայնությամբ ավել պայմաններ ավելացնել պայմանագրում, եթե դրա կարիքը տեսնում է։ Գործատուն և աշխատողն իրենք կարող են որոշել` հարթակում այդ ինֆորմացիան ավելացնեն, թե դա լինի առանձին համաձայնագրերի միջոցով»,-ասել է Սարգսյանը։
Սարգսյանի խոսքով` երբ գործատուն լրացնի բոլոր պարտադիր դաշտերը, պետք է դնի էլեկտրոնային ստորագրություն (գործատուն իր անունից ստորագրելու լիազորություն կարող է տալ այլ անձի)։ Աշխատանքի ընդունվողն իր էլեկտրոնային հասցեին կստանա ծանուցում, որ ստեղծվել է պայմանագիր։
«Աշխատանքի ընդունվողի համար այդ ամենը տեղի է ունենում «Ես եմ» հարթակում ։ Մուտք գործելով հարթակ` աշխատանքի ընդունվողը տեսնում է իր համար ստեղծված պայմանագիրը, և եթե համաձայն է, դնում է իր էլեկտրոնային ստորագրությունը»,- պարզաբանել է Սարգսյանը։
Հարթակում հնարավոր կլինի նաև փոփոխություններ կատարել պայմանագրում։ Աշխատանքից ազատվելու հրամանը նույնպես տրվելու է այդ հարթակում։
