44-օրյա պատերազմից չհուղարկավորված մարմիններից փոքրաթիվ դեպքեր կան, որ վերջին շրջանում հուղարկավորել ենք։ Աշխատանքներն այս ուղղությամբ շարունակվում են, լրագրողների հետ զրույցում այսօր հայտարարեց Առողջապահության նախարար Անահիտ Ավանեսյանը։
Նա միաժամանակ հավելեց, որ միջգերատեսչական խմբի շրջանակներում ամեն մեկն իր գործառույթները տանում է, որպեսզի այս գործընթացում հնարավորինս մեղմ, ճիշտ և բոլոր հանգամանքները հաշվի առնելով՝ հնարավոր լինի ի վերջո բոլոր աճյունները հուղարկավորել։
Նախարարը միաժամանակ պարզաբանեց՝ իր թվարկած դեպքերում ծնողներն են իրենց համաձայնությունը տվել, և հուղարկավորությունն էլ իրենք են արել։
«Այն դեպքերում, երբ նույնականացումն իրականացվել է, բայց ծնողները, հարազատները չեն ընդունում արդյունքները, այս մասով դեռ աշխատանքները շարունակվում են։ Երբ քննարկման արդյունքը լինի, ես իմ լիազորությունների շրջանակում տեղյակ կպահեմ»,- ասաց Անահիտ Ավանեսյանը։
Նախարարը չցանկացավ որևէ թիվ հրապարակել։
