Պատրաստ ենք ԱՄՆ-ի հետ քննարկել կարգավորման հարցը Ուկրաինայում, բայց միայն հավասար, փոխընդունելի հիմունքներով. ՌԴ ԱԳՆ
ԱՄՆ նախագահ Դոնալդ Թրամփի թիմը հետաքրքրված է Վաշինգտոնի և Մոսկվայի միջև երկխոսության վերսկսմամբ, և Ռուսաստանը պատրաստ է դրան. ասել է փոխարտգործնախարար Սերգեյ Ռյաբկովը։
«Մենք պատրաստ ենք երկխոսության, ինչի մասին բազմիցս ասվել է, այդ թվում՝ պատրաստ ենք քննարկել կարգավորման հարցը Ուկրաինայում, բայց միայն հավասար, փոխընդունելի հիմունքներով»,- նշել է նա։
Դիվանագետի խոսքով՝ արտաքին քաղաքական գերատեսչությունների միջև որոշակի փոխգործակցություն կա։ Միաժամանակ նա ընդգծել է, որ այսօր Վլադիմիր Պուտինի և Թրամփի միջև շփման համաձայնեցված ժամանակացույցեր չկան։
Ինչպես ընդգծել է փոխարտգործնախարարը, Մոսկվան բազմիցս ասել է, որ երկու երկրների հարաբերությունները փլուզման եզրին են: Սակայն նա հավելել է, որ նոր վարչակազմի օրոք հարաբերությունների նորմալացման փոքր հնարավորություն կա։
Մոսկվան Վաշինգտոնից տարբեր ազդանշաններ է ստանում Ուկրաինայի հակամարտության վերաբերյալ, սակայն գործնականում ԱՄՆ-ի կուրսի փոփոխություն դեռևս չի տեսել, ասել է Ռյաբկովը ։
