Բագրատունիների բերդը. Գուսանագյուղի ամրոց

Մեր Հայրենիքի պատմամշակութային հուշարձանները.

Գուսանագյուղի բերդը կառուցվել է հավանաբար Բագրատունյաց թագավորության ժամանակաշրջանում՝ X-XI դդ.: Այս բերդը հանդիսացել է միջնադարյան Հայաստանի մայրաքաղաք Անիի պաշտպանական համակարգի կարևոր հենակետերից մեկը և հսկել դեպի Թիֆլիս տանող միջազգային առևտրական ճանապարհը։

Դղյակ-ամրոցն ունեցել է եռահարկ հորինվածք` փայտե միջհարկային ծածկերով: Երկրորդ հարկ բարձրացել են քարե սանդուղքով, իսկ երրորդ հարկ՝ հավանաբար փայտե սանդուղքով: Պատերի պահպանված բարձրությունը մինչև 7 մ է: Դղյակն անկյուններում ունի կիսակլոր աշտարակներ, իսկ հյուսիսային ու հարավային պատերն ամրացված են ուղղանկյուն որմնահեցերով:

Ամրոցի պատերի ստորին շարքերը կառուցված են մեծ որձաքարերով, իսկ վերին շարքերը՝ սև, կոպիտ մշակված տուֆ քարերով, ամրացված են կրաշաղախով: