«Oc-Media» կայքում տեղադրված լրագրող Այտան Ֆարհատովայի հոդվածից տեղեկանում ենք, որ նոր տարվա օրերին Հունաստանի ոստիկանությունը Աթենքի մոտակայքում գտնվող մի շքեղ առաձնատանը կայացած խրախճանքի ժամանակ շուրջկալել է տարածքը եւ ձերբակալել Ադրբեջանի նախագահ Իլհամ Ալիեւի անմիջական զարմուհի DJ Իզզաթխանում Ջավադովային: Հոդվածի հեղինակը մանրամասնել է, որ ըստ «Meydan TV»-ի ոստիկանությունը տեղազննման արդյունքում խրախճանքը կազմակերպող Ջավադովայի «ննջարանում» հայտնաբերել է կոկաին պարունակող 45 փաթեթ, էքստազի հասցնող այլ արգելված թմրադեղեր եւ շուրջ 45 հազար եվրո (46 հազար դոլար) պարունակող գանձապահարան: Տասը հոգի ձերբակալվել է, որոնցից երկուսը ոստիկաններ եւ մեկը դատական ոստիկանության աշխատող, որին հանձնարարված է եղել «վերահսկել երեկոն»:
44 տարեկան Ջավադովան Ադրբեջանի նախկին նախագա Հեյդար Ալիեւի եղբոր, ասինքն` ներկա նախագահ Իլհամ Ալիեւի հորեղբոր` հանգուցյալ Ջալալ Ալիեւի դուստրն է, որ մեծացել է Ռուսաստանում: 2015-ին «Միքայելա» (իր դստեր) անվան տակ սկսել է բեմական երաժշտական կյանք վարել, որպես DJ աշխատել եւ ելույթներ ունենալ Իվիսայում (Բալեարյան կղզիներ, Իսպանիա), Հունաստանում եւ Թայլանդում: 2021-ին բրիտանական իշխանությունները Ջավադովային եւ նրա ամուսնուն` Սուլեյման Ջավադովին մեղադրանք են ներկայացրել փողերի լվացման մեքենայությունների հետ կապ ունենալու համար: Այդ տարվա ընթացքում հրապարակված «կազմակերպված հանցագործության եւ կոռուպցիայի» զեկուցագրի (OCCRR) համաձայն, Ջավադովաները «կոռուպցիայի, գողության եւ փողերի յուրացման հետեւանքում գրպանել էին 17 միլիոն ֆունտ ստերլինգ: Զեկույցում նշվել էր, որ մինչ նախկինում բարձրաստիճան ադրբեջանցիներ օգտվել էին փողերի լվացման մեքենայություններից, Ջավադովները առաջինն էին, որ կառավարող իշխանության ընտանիքին էին պատկանում: Չնայած իրենք այնքան էլ ճանաչված դեմքեր չեն քաղաքական դաշտում, նրանք կապեր ունեն ադրբեջանցի քաղաքական շատ գործիչների հետ: Սուլեյմանի հայրը էներգետիկայի նախարարի տեղակալն էր եղել 2014-ից 2020 թվերին:
Ակնկալվում էր, ըստ հոդվածագրի, որ իշխանությունները պարտավոր էին «առավել մեծ հսկողություն սահմանել» նրանց վարքագծի նկատմամբ, որպեսզի չհայտնվեին փողերի լվացման մեքենայությունների ցուցակում: Ըստ OCCRR զեկուցագրի, սակայն, Ջավադովը բրիտանական մի բանկում հաշիվ բացելուց նշել է, որ ինքը ոչ մի առնչություն չունի նախարարի տեղակալի հետ, այլ «պարզապես նրա անվանակիցն է»:
Պատրաստեց` ՀԱԿՈԲ ԾՈՒԼԻԿՅԱՆԸ
(The Armenian Mirror-Spectator)
