Հովիկ Աղազարյանն այսօր ԱԺ դահլիճում նստած է, չէ՞, «պաձյեզդում» նրա վրա չեն հարձակվում, որևիցե քրեական գործ դրա առումով չի հարուցվել, ԱԺ-ում լրագրողների հետ զրույցում ասաց ԱԺ նախագահ Ալեն Սիմոնյանը՝ անդրադառնալով ՀՀ առաջին նախագահ Լևոն Տեր-Պետրոսյնաի հայտարարությանը, որ հակասահմանադրական է պատգամավորին հորդորել վայր դնել մանդատը։
«Բայց ես առաջարկում, որ Լևոն Տեր-Պետրոսյանն իր թեկնածությունը դնի 2026 թվականին, Նիկոլ Փաշինյանն էլ կդնի, ես էլ կդնեմ, և կտեսնենք՝ ՀՀ ժողովուրդն ինչ վճիռ կկայացնի։ Իսկ մնացածը խոսակցություններ են»,- ասաց նա։
Անդրադառնալով ԱԺ պատգամավոր Գեղամ Նազարյանի այն հայտարարությանը, թե Ռոբերտ Քոչարյանը ժողովրդավար է, և վերջինս իրեն հորդորել է չդնել մանդատը,Ալեն Սիմոնյանը նկատեց՝ «Ռոբերտ Քոչարյանը ժողովրդավար է» բառակապակցությունն իրենով նոնսենս է։
«Երկրորդ, վստահ եմ, որ պարոն Նազարյանը չէր դնի մանդատը, եթե նույնիսկ խնդրեին։ Շատ մարդիկ 2021-ին «Հայաստան» դաշինքին ձայն են տվել Նազարյանի կորստի, ելույթի, աշպխատանքի շնորհիվ, և բարոյական էլ չէ պարոն Նազարյանից խնդրել, որ մանդատը դնի։
Կարծում եմ՝ Դաշնակցությունը փորձում է «Հայաստան» խմբակցությունից կամաց-կամաց դուրս մղել ոչ դաշնակցականներին, և դա մեծ պլան է։ Կարելի է մտածել՝ իրենցից որևէիցե մեկն ինձ հետ գործուղման չի եկել, հաց չի կերել, չի նկարվել։
Աղվան Վարդանյանը մոտեցել է իմ աշխատակցին՝ ասել են՝ բա ինչի՞ մեզ չեք տանում Բալթյան երկրներ, Սեյրան Օհանյանը մոտեցել է, ասել է՝ ես այսինչ երկրի բարեկամական խմբի անդամն եմ, ղեկավարն եմ, ինչի՞ ինձ չեք ներառում։ Աղվան Վարդանյանը մոտեցավ ինձ, ասեց՝ ե՞րբ ազատ կլինեք՝ գնանք, սրճենք, զրուցենք իրար հետ։
«Հայաստան» դաշինքի պատգամավորները բողոքում են, ասում են՝ ուզում ենք գնանք, աշխատենք, բայց չեն թողնում։ Պետք է գան, աշխատեն, պատգամավոր են ընտրվել։ Կանչում եմ հանդիպման, չեն գալիս… Պատճառաբանություն բերում են տարբեր, որ մի քանի օրից հիվանդ են լինելու, ծիծաղելի այլ բաներ»,- ասաց Սիմոնյանը՝ հավելելով, որ առաջիկա այցին Հնդկաստան երկու պատգամավոր արդեն իսկ մերժել է իր հրավերը, նամակ գրել է նաև երրորդ պատգամավորին։
