Մեկնարկած հրաժարականներն ունեն ինչպես օբյեկտիվ, այնպես էլ սուբյեկտիվ պատճառներ. օբյեկտիվ պատճառները մի շարք գերատեսչությունների ոչ բավարար աշխատանքն են, Azg.am-ի թղթակցի հետ զրույցում ասաց քաղաքագետ Դավիթ Ստեփանյանը։
«Բերեմ մեկ վառ օրինակ՝ Նոր Հաճնի կամուրջը։ Այն պետք է շահագործվեր դեռ հոկտեմբերին՝ չշահագործվեց։ Պետք է շահագործվեր նոյեմբերին, սակայն առայժմ չի շահագործվել, և Տարածքային կառավարման նախարարությունը որևէ ժամկետ չի էլ հայտարարում։ Սա շատ լուրջ խնդիր է, որովհետև բավականին մեծ թվով բնակավայրեր մնացել են շրջանցող ճանապարհի հույսին։
Այո՛, կարող են ասել, որ կամուրջը վատ վիճակում է, երկար ժամանակ չի վերանորոգվել, բայց եթե սկսում ես կամուրջ վերանորոգել, և գլխավոր ճանապարհը փակվում է, տրամաբանական է, որ մինչ այդ շրջանցող ճանապարհը պետք է վերանորոգեիր՝ դրանով անխափան երթևեկություն ապահովելու համար։ Իսկ շրջանցող ճանապարհը քարուքանդ վիճակում է, ես անձամբ տեսել եմ դա։
Այսինքն՝ չկա պլանավորում, չկա ռազմավարություն։ Ո՞ւմ մեղավորությունն է սա. Տարածքային կառավարման նախարարության և անձամբ նախարարի, որն սկսել է մի գործընթաց՝ չապահովելով այլընտրանք»,- նշեց Դավիթ Ստեփանյանը։
Ըստ քաղաքագետի՝ այսպիսի բացերը բազմաթիվ են, և Նիկոլ Փաշինյանն անձամբ չի կարող բոլոր հարցերով միայնակ զբաղվել։
«Ինչպես արդեն նշեցի, օբյեկտիվ պատճառներ կան, որ այդ մարդկանց ուղարկել են տուն։ Բայց խոսենք նաև սուբյեկտիվ պատճառներից։ Պարզ է և հասկանալի, որ սա Նիկոլ Փաշինյանի կողմից օգտագործվում է որպես PR ակցիա։ Նա այսկերպ ի՞նչ է ուզում ասել. ուզում է ասել՝ եթե դուք չեք կարողանում աշխատել, ամեն մեկդ ձեր գործն անել, ստիպված եմ անձամբ դրանով զբաղվել, ստիպված եմ ձեզ տուն ուղարկել և փորձել առկա խնդիրները լուծել միանձնյա։
Հնարավո՞ր է դա. իհարկե հնարավոր չէ։ Արդյոք սա քաղաքական պոպուլիզմ է. իհարկե քաղաքական պոպուլիզմ է։ Այսինքն՝ սա նախընտրական արշավի մի մասն է, որը Նիկոլ Փաշինյանն արդեն սկսել է»,- ասաց մեր զրուցակիցը։
Անդրադառնալով արդարադատության ոլորտի պատասխանատուների հրաժարականներին՝ քաղաքագետը նկատեց՝ 2018 թվականից առաջ և հիմա էլ ոլորտը գտնվում է խայտառակ վիճակում, մարդիկ շարունակում են կարոտ մնալ արդարադատությանը։
«Մեր դատարանները երկրում արդարադատություն չեն ապահովում։ Ո՞ւմ մեղավորությունն է սա. միգուցե մասամբ ԲԴԽ նախագահի։ Արդյոք ամբողջ մեղավորությունը միայն Կարեն Անդրեասյանի վրա է. միանշանակ ոչ։ Արդյոք այստեղ չկա Նիկոլ Փաշինյանի անձնական մեղավորությունը. միանշանակ այո»,- նշեց քաղաքագետը։
Դավիթ Ստեփանյանը միաժամանակ տեսակետ հայտնեց, որ հեռացածների փոխարեն այլ մարդիկ են գալու, սակայն դրանից ոչինչ չի փոխվելու։
«Եթե Նիկոլ Փաշինյանն իսկապես ուզում էր արդարադատության խնդիրները լուծել, հենց հեղափոխությունից հետո պետք է սահմանադրական հանրաքվե աներ, լյուստրացիա հայտարար, բոլոր դատավորներին անխտիր ենթարկեր լյուստրացիայի»,- ասաց մեր զրուցակիցը։
Ամփոփելով՝ քաղաքագետն անդրադարձավ նաև այպես կոչված կադրային սովին՝ շեշտելով, որ իսկական կադրային սովը կառավարությունում և ՔՊ-ում է, մինչդեռ երկրում կադրերի սով չկա. պետք է ընդամենը փնտրել լավ մասնագետների ոչ թե յուրայինների մեջ, այլ ուրիշ տեղերում՝ անկախ այդ մարդկանց կուսակցական պատկանելությունից։
«Տրանսպորտային ռեֆորմը, որ Ավինյանը տապալում է, չե՞ն կարողանում մի հոգի մարդ բերել արտերկրից՝ նույն Մոսկվայից, որտեղ տրանսպորտը փայլուն է աշխատում, այդ մարդն այդ մոդելը ներդնի»,- հարց հնչեցրեց Դավիթ Ստեփանյանը։
Հիշեցնենք, որ հրաժարականի դիմում են ներկայացրել մի շարք գերատեսչությունների ղեկավարներ։ Նրանց թվում են ՆԳ նախարար Վահե Ղազարյանը, Պետեկամուտների կոմիտեի նախագահ Ռուստամ Բադասյանը, Քննչական կոմիտեի նախագահ Արգիշտի Քյարամյանը, ԲԴԽ նախագահ Կարեն Անդրեասյանը և Հակակոռուպցիոն կոմիտեի նախագահ Սասուն Խաչատրյանը։
