Պեկինը պաշտոնապես բացատրություն պահանջեց Վաշինգտոնից
Նախագահ Բարաք Օբաման հանդես է եկել ԱՄՆ Ազգային անվտանգության ծառայության (ԱԱԳ) պաշտպանությամբ, հաղորդում է Ասոշիեյթեդ պրես գործակալությունը: Նրա խոսքերով, ԱԱԳ համացանցային եւ հեռախոսային լրտեսման ծրագրերը չեն հակասում սահմանադրությանը:
PBS հեռուստաալիքին տված հարցազրույցում Օբաման հայտարարել է, թե ԱԱԳ գործունեությունը «թափանցիկ» է, իսկ օտարերկրյա հատուկ ծառայությունների վերահսկման դաշնային օրենքին համապատասխան ստեղծված մասնագիտացված դատարանը ապահովում է քաղաքացիների իրավունքների պաշտպանությունը եւ զսպման ու հակակշիռների համակարգի պահպանումը: Դռնփակ գործող հենց այդ դատարանն էր թույլատրել ԱԱԳ սկանդալային ծրագրերի կիրառությունը:
Հարցազրույցի ժամանակ Օբաման խոստովանել է, որ լրտեսումը միշտ չէ, որ արդարացված է: Մասնավորապես ԱԱԳ ծրագրերն անհրաժեշտ չէին 2009-ին պակիստանցի Նաջիբուլլահ Ջազիի մերկացման ժամանակ, որը նախապատրաստում էր ահաբեկչություններ Նյու Յորքի մետրոյում:
Ավելի վաղ հենց Ջազիի դեպքն էր մատնանշել ԿՀՎ եւ ԱԱԳ նախկին աշխատակից Էդվարդ Սնոուդենը, որը օրերս լրատվամիջոցներում բացահայտել էր այդ հատուկ ծառայությունների համացանցային լրտեսման եւ հեռախոսազրույցների գաղտնալսման ծրագրերը:
ԱՄՆ իշխանությունները գաղտնի տեղեկությունների հրապարակման մեղադրանքով քրեական գործ են հարուցել ներկայումս Հոնկոնգում գտնվող Սնոուդենի դեմ: Ի դեպ, հունիսի 17-ին համացանցային կոնֆերանսի ընթացքում «Գարդիան» թերթի ընթերցողների հարցերին պատասխանելիս Սնոուդենն ասել է, որ այսուհետեւ նույնիսկ իր լռությունը չի կանխի ամերիկյան հատուկ ծառայությունների գործունեության նորանոր մերկացումները: «Հիմա կարող եմ միայն ասել, որ ԱՄՆ կառավարությանը չի հաջողվի ինձ բանտարկելու կամ սպանելու միջոցով թաքցնել այդ ամենը: Ճշմարտությունը կբացահայտվի, եւ դա անհնար է կանգնեցնել», հայտարարել է Սնոուդենը: Ըստ որում, նա վճռականորեն մերժել է այն ենթադրությունը, թե ինքը կհամագործակցի ՉԺՀ հետախուզության հետ: ԱՄՆ-ից իր փախուստը նա բացատրել է այն փաստով, որ ինքը չի հավատում արդար դատավարությանը:
«Ֆիգարո» թերթի կայքէջը հունիսի 18-ին հաղորդեց, որ Էդվարդ Սնոուդենի բացահայտումներից հետո առաջին անգամ Չինաստանը սկսել է ԱՄՆ-ից հաշիվ պահանջել վերջինիս կիբեռնետիկական լրտեսության փորձերի համար: ՉԺՀ արտգործնախարարության խոսնակը հայտարարել է, որ Վաշինգտոնը «պարտավոր է հաշվի առնել միջազգային ընկերակցության հարցումները եւ անհրաժեշտ բացատրությունը տալ»:
