Իրանը չի հրաժարվի իսլամական հանրապետությանն իսրայելական հարվածին պատասխանելու իր իրավունքից։ Այս մասին հայտնել է Իրանի արտաքին քաղաքական գերատեսչության պաշտոնական ներկայացուցիչ Էսմայիլ Բաղաին։
«Իրանը չի նահանջի սիոնիստական վարչակարգի ագրեսիային պատասխանելու իր իրավունքից։ Դա Իրանի պարտականությունն է, որն ամրագրված է միջազգային իրավունքում եւ ցանկացած երկրի օրենսդրությունում, որը բախվում է ագրեսիայի եւ ուժի կիրառման։ Մենք վճռական ենք եւ լուրջ սիոնիստների հարձակմանը պատշաճ կերպով պատասխանելու մեջ։ Դա տեղի կունենա այն ժամանակ, երբ զինված ուժերը եւ պաշտոնական անձինք համապատասխան որոշում կայացնեն»,- ասել է Բաղաին մամուլի ասուլիսում։ Հեռարձակումը վարել է Իրանի պետական ռադիոհեռուստատեսային ընկերությունը։
«Մեր զինված ուժերը մշտապես հետեւում են սիոնիստական վարչակարգի բոլոր գործողություններին։ Մեր հակաօդային պաշտպանության համակարգերը միջամտել են ժամանակին եւ հետ մղել սիոնիստական վարչակարգի արկերի մեծ մասը»,- ավելացրել է նա։
Ավելի վաղ Իսլամական հեղափոխության պահապանների կորպուսի հրամանատար, գեներալ-մայոր Հոսեյն Սալամին էր հավաստիացրել, որ Իսրայելը լուրջ հետևանքներ կկրի՝ շաբաթ գիշեր Իրանի ուղղությամբ հասցրած ավիահարվածներից համար։
«Ոճրագործության հետևանքներն աներևակայելի կլինեն զավթիչների համար»,- Սալամիի խոսքերն էր մեջբերել Mehr գործակալությունը։
Երեկ էլ Իրանի նախագահ Մասուդ Փեզեշքիանն է հայտարարել․ «Թեհրանը համարժեք պատասխան կտա սիոնիստական ռեժիմի ագրեսիային»։
