Վ. Պ.
Հոկտեմբերի 16-ին Ադրբեջանում տեղի են ունենալու նախագահի ընտրություններ, որոնց մասնակցության հայտեր արդեն իսկ ներկայացված են, չնայած որպես հիմնական թեկնածուի ներկայիս նախագահ Ալիեւից բացիՙ որեւէ անձի անուն չի նշվում: Ամեն դեպքում, Ալիեւին են թերեւս հաղթող տեսնում նաեւ միջազգային հանրության որոշ ներկայացուցիչներ, քանի որ որոշ ծրագրերի իրականացումը ներկայումս Ալիեւի մասնակցությամբ ծրագրելը հենց դա է նշանակում:
Խոսքը, տվյալ դեպքում, Հայաստանի եւ Ադրբեջանի նախագահների հանդիպմանն է վերաբերում, որպիսին կարծես թե կազմակերպվում է, եւ դա այն դեպքում, երբ Հայաստանում ընտրությունների ողջ տարին համարվեց «ոչ բարենպաստ» բանակցային գործընթացի շարունակականություն ապահովելու աշխատանքների համար: Բայց ստացվում է, որ Ադրբեջանում, դրսում էլ գիտեն, որ բան չի փոխվելու. բավականին կանխատեսելի երկիր է, Հայաստանին ոչ նման…
Ինչեւէ, Ադրբեջանի արտաքին գերատեսչության ղեկավար Էլմար Մամեդյարովը երեկ, ըստ «Թրենդ» գործակալության, հայտարարել է, որ հունիսի վերջին հանդիպելու է Հայաստանի ԱԳ նախարար Էդվարդ Նալբանդյանին` «քննարկելու Սերժ Սարգսյանի եւ Իլհամ Ալիեւի հանդիպման նախապատրաստմանն առնչվող հարցեր»:
Մամեդյարովը նաեւ տեղեկացրել է, թե Վաշինգտոնից վերադարձին (նախորդ շաբաթ Վաշինգտոն ինչպես Մամեդյարովի, այնպես էլ Հայաստանի արտգործնախարար Նալբանդյանի այցերին «Ազգն» անդրադարձել է` ԱՄՆ պետքարտուղար Ջոն Քերրիի հետ հադիպումներից առաջ արված հայտարարությունների համատեքստում) Լոնդոնում հանդիպել է ԵԱՀԿ Մինսկի խմբի համանախագահներին ու քննարկել «Հայաստանի եւ Ադրբեջանի նախագահների սպասվող հանդիպման օրակարգն ու ժամկետները»:
«Նախագահների հանդիպման նպատակը ղարաբաղյան հակամարտության կարգավորման հարցերի քննարկումն է: Ես սպասում եմ Հայաստանի ԱԳ նախարար Էդվարդ Նալբանդյանի հետ հանդիպմանը, որպեսզի բազմակողմանի քննարկենք նախագահների հանդիպման նախապատրաստման հարցերը», ասել է Մամեդյարովը:
