Ադրբեջանի մշակույթի նախարարությունը և Մտավոր սեփականության գործակալությունը համատեղ հայտարարություն են տարածել ադրբեջանցի կոմպոզիտոր Բահրամ Նասիբովի «Ղարաբաղ» երաժշտական ստեղծագործության ապօրինի յուրացման և հեղինակային իրավունքի խախտման վերաբերյալ։
Համատեղ հայտարարության մեջ ասվում է, որ հայերի կողմից ադրբեջանցի հեղինակների ստեղծագործությունները և ադրբեջանական բանահյուսությունը յուրացնելու դեպքերը շարունակվում են։
Նշվում է, որ նման մեկ այլ դեպք էլ կապված է Գոռ Եփրեմյանի հետ։ Նա կատարել է «Karabakh» ստեղծագործությունը, որի խոսքերի և երաժշտության հեղինակը ադրբեջանցի հայտնի կոմպոզիտոր Բահրամ Նասիբովն է։
Ինչպես տեսնում ենք, ադրբեջանցիները բոլոր ճակատներով պահանջներ են ներկայացնում։ Նակինում Հայաստանից, հայ ժողովրդից, հայ պատմությունից ու հայ մշակույթից երկնչողների բերանում այսօր լեզու են դրել հենց ՀՀ իշխանությունները։
Ոչ հեռավոր անցյալում Հայաստանն էր Ադրբեջանին մեղադրում գրագողության, հայկական մշակույթը յուրացնելու մեջ, դիմում ՅՈՒՆԵՍԿՕ-ին ու փաստերով ապացուցում, որ մեկդարյա կենսագրություն ունեցող մեր քոչվոր հարևանները մեծ ախորժակ ու հավակնություններ ունեն։
Իսկ վերջին տարիներին գրեթե ամեն օր Ադրբեջանից նոր սպառնալիքներ ու զրպարտություններ ենք լսում։
Հերթականը սա է.
«Փոխելով երգի խոսքերը՝ Եփրեմյանը Youtube-ում տեղադրել է տեսանյութ՝ «Սիրուն ջան» վերնագրով «Armenian Folk», այսինքն՝ «Հայկական ժողովրդական երգ» մակագրությամբ։
Այս գրագողությունը, ինչպես Ուզեյիր Հաջիբեկովի ստեղծագործությունները հայերի կողմից յուրացնելու դեպքում, իրավացիորեն լայն հնչեղություն են ստացել ադրբեջանական հասարակության մեջ, և 2024 թվականի հուլիսի 9-ին Ադրբեջանի մտավոր սեփականության գործակալությունը հրապարակել է ծավալուն մեկնաբանություն․
«Պահանջում ենք Հայաստանից վերացնել գրագողության դեպքերը։
Պահանջում ենք վերջ տալ ադրբեջանցի կոմպոզիտոր Բահրամ Նասիբովի «Ղարաբաղ» երգը Գոռ Եփրեմյանի կատարմամբ փոփոխված՝ որպես հայկական ժողովրդական «Սիրուն ջան» երգ ներկայացնելուն և վերականգնել Բահրամ Նասիբովի հեղինակային իրավունքները։
Պահանջում ենք միջազգային իրավունքի և ազգային օրենսդրության համաձայն՝ պատասխանատվության ենթարկել խախտում կատարած անձանց, տեղեկացնել ձեռնարկված միջոցառումների մասին»,- ասված է հաղորդագրությունում։
Ամենայն հավանականությամբ՝ խոսքն այս երգի մասին է՝ https://www.youtube.com/watch?v=xbFwavNaTHI&ab_channel=GorYepremyan
