Կար ժամանակ, երբ գոյություն ունեին այսպես կոչված «թաղի տղա», «ինստիտուտի տղա», «քաղաքի տղա» եւ այլ հասկացություններ: Օրինակՙ «թաղի տղան» երբեք թույլ չէր տա, որ «իր թաղում» որեւէ մեկը որեւէ անընդունելի բան անի, ասենք, ինչ-որ մեկը հայհոյի բակում, կռիվ անի: Սա համապատասխանաբար թույլ չէին տալիս «ինստիտուտի տղա» ինստիտուտում, «քաղաքի տղան» քաղաքում, եւ այլն: Ընդհանուր առմամբ այս տղաները այն ժամանակվա «թաղային հեղինակություններն» էին, «լավ տղաները», որոնք ժամանակի ընթացքում եկան մեր օրերը արմատապես խեղաթյուրված, ինչպես մեր օրերում շատ բան: Մենք սկսեցինք թաղի խուժանի հետ շփոթել թաղային հեղինակությանը, այնինչ «թաղի տղան» ամենեւին էլ վատ բան չէ:
Այն, ինչ տեղի է ունեցել հունիսի մեկին Գորիսում, այս ամենի հետ կապ ունի այնքանով, որքանով միջադեպը տեղի է ունեցել Սյունիքի մարզպետ Սուրիկ Խաչատրյանի առանձնատան դիմաց, ավելին, միջադեպի համար ձերբակալվել է Սուրիկ Խաչատրյանի որդին նաեւ, ով կասկածվում է սեփական տան դիմաց մարդ սպանելու, մարդ վիրավորելու, հրազեն բանեցնելու եւ սեփական տանը հրազենային միջոցներ կուտակելու մեջ: Գուցե ՄԱԿ-ին կամ միջազգային այլ կազմակերպություններին Ադրբեջանի սպառազինություն ձեռք բերելու հարցից բացի մտահոգեր նաեւ Հայաստանում առանձին անհատների սպառազինության կուտակման հարցը, բայց սա լրիվ այլ խոսակցության թեմա է:
Գորիսում մարդ են սպանել, ու կարեւորն այն չէ անգամ, թե կհրաժարվի իր պաշտոնիցՙ Սյունիքի մարզպետը: Սա կարեւոր չէ, որովհետեւ իհարկե պետք է հրաժարվի, որովհետեւ սեփական տան դիմաց մարդ սպանող, մարդու վրա կրակող որդու հայրը չպետք է մարզպետ աշխատի: Կարեւոր չէ անգամ այն, որ սպանվածներից մեկը Արցախի ՊԲ-ի գնդապետ Արտակ Բուդաղյանի եղբայրն է, իսկ ինքըՙ գնդապետը, նույն միջադեպի ժամանակ վիրավորվել է, ու այժմ, զինվորական հոսպիտալի բժիշկների գնահատմամբ, «ծանր վիճակում է»: Կարեւորն ամենեւին այն չէ, որ տպավորություն կա, թե վերջին ժամանակներում հայ սպաների ուղղությամբ ավելի շատ կրակում են սահմանի այս կողմում, քան սահանի այն կողմից:
Կարեւորը բոլորովին ուրիշ բաներն են: Ըստ տեղեկություններիՙ Բուդաղյանները եղել են Սուրիկ Խաչատրյանի սանիկները, այսինքնՙ նաեւ Սուրիկ Խաչատրյանի որդու սանիկները: Փաստորեն, ըստ առաջադրված մեղադրանքիՙ Սուրիկ Խաչատրյանի որդին մեղադրվում է սեփական սանիկների վրա սեփական տան դիմաց կրակելու, մեկինՙ սպանելու մեջ… Սուրիկ Խաչատրյանի տանը հունիսի մեկին խուզարկությամբ հայտնաբերվել են հրազենի տարբեր տեսակներ: Եթե Սուրիկ Խաչատրյանը գիտի այս մասին, բայց ոչինչ չի ձեռնարկել դրանք իր տնից վերացնելու ուղղությամբ, ուրեմն նա լավ չի դաստիարակել իր որդուն, եթե Սուրիկ Խաչատրյանը չգիտեր այս ամենի մասին, ուրեմն կրկին լավ չի դաստիարակել որդուն:
Կարեւորը հենց սա է, որ մեր տան առաջ մեր որդին կրակում է մեր սանիկների վրա, որոնցից մեկին սպանում է մեր տանը կուտակված հրազենով: Եվ այդ ամենը տեղի է ունենում մի շատ խորհրդանշական օրՙ հունիսի մեկին, երեխաների պաշտպանության միջազգային օրը, երբ մենք առավել պետք է մտահոգված լինենք մեր երեխաների պաշտպանության հարցերով:
Իսկ թաղային, քաղաքային, համապետական հեղինակությունը փողոցի խուժան չէ:
