Քաղաքագետ Արմեն Բաղդասարյանի կարծիքով՝ ոչ միայն «Բարգավաճ Հայաստան» կուսակցության ղեկավար Գագիկ Ծառուկյանը, այլ նաև ծանրակշիռ մյուս քաղաքական ուժերի առաջնորդները շարժմանը միանալուց առաջ զգուշավորություն կցուցաբերեն։ Եվ այդպիսի վարքագծի պատճառը կլինի ոչ թե այն՝ արդյոք շարժման հաղթանակի հավանականությունը մեծ է թե ոչ, այլ այն, որ քաղաքական գործիչներն զգուշավոր կլինեն, քանի դեռ հստակ քաղաքական ծրագիր ներկայացված չէ։
«Այո՛, շարժումը կա, այն բավական դինամիկ զարգանում է։ Շարժման պոտենցիալը կա, բայց դեռևս հստակ ծրագիր չկա։ Որևէ քաղաքական ուժ շարժմանը միանալուց առաջ պետք է որ ցանկանար իմանալ՝ ի վերջո ինչ ծրագրի և գաղափարի է միանում»,-Azg.am-ի թղթակցի հետ զրույցում ասաց քաղաքագետը։
Հարցին, եթե Գագիկ Ծառուկյանն, ամեն դեպքում, ինչ-որ պահից որոշի սատարել Բագրատ սրբազանի առաջնորդած շարժմանը, ԲՀԿ-ի ներկայությունը դրակա՞ն, թե ավելի շատ բացասական ազդեցություն կթողնի պայքարի ընթացքի և հեղինակության վրա, Արմեն Բաղդասարյանը պատասխանեց.
«Գիտեք, այս շարժման մեջ, կարելի է ասել ՝անգամ ներքաղաքական առճակատման մեջ նախկիններ-ներկա գիծը չէ, որ տարվում է։ Այս հարցում ավելի շատ աշխարհաքաղաքական սահմանազատում է նկատվում՝ ոչ այնքան ներկաների և նախկինների, որքան թերևս արևմտամետների և ռուսամետների։ Այսինքն՝ քաղաքական դաշտի այս կամ այն հատվածն ինչպես է պատկերացնում՝ ուժային որ բևեռի աջակցությամբ պետք է փորձի առաջ շարժվել Հայաստանը։
Փաստորեն, տարանջատումը արևմտամետ-ռուսամետ է, ոչ թե՝ նախկիններ և ներկաներ։ Դրա համար էլ, եթե բաժանումն այս ձևով է դրվում (իսկ դա այդպես է), այդ դեպքում նախկինները և ներկաները դառնում են զուտ քարոզչական հնարք՝ հասարակական գիտակցությա վրա ազդելու նպատակով։ Այսինքն ՝ դա շահարկելը կլինի զուտ քարոզչկան գործիք»,- նշեց մեր զրուցակիցը։
Վերջում քաղաքագետը չբացառեց, որ գործող իշխանության որոշ ներկայացուցիչներ անցնեն Բագրատ սրբազանի առաջնորդած շարժման կողմը, և հակառակը՝ այնպիսի ուժեր, որոնք այսօրվա իշխանություններին ակնհատ դեմ են, նույն աշխարհաքաղաքակն նկատառումներից ելնելով՝ ձեռնպահ մնան շարժմանը միանալ։
«Այն, ինչ այսօր խոսվում է, խոսվում է առաջին քայլի մասին՝ հասնել իշխանափոխության։ Երկրորդ քայլի մասին առայժմ տակտիկական նկատառումներով չեն խոսում։ Հենց որ սա էլ հստակ երևա, քաղաքական դաշտում կարող են անակնկալ դերաբաշխումներ լինեն»,- ամփոփեց Արմեն Բաղդասարյանը։
Հիշեցնենք՝ Բարգրատ սրբազանը հայտարարել էր, որ նախօրեին հանդիպել է Գագիկ Ծառուկյանին։ Հանդիպումը, ըստ Սրբազանի, կայացել է ԲՀԿ ղեկավարի տանը՝ ընտանեկան միջավայրում։
«Երկու կամ երեք օր առաջ էր, որ իր գրասենյակի միջոցով դիմել էինք, թե ինչ է հնարավոր անել Տավուշի և Լոռիի շրջանում մարդկանց կարիքները հոգալու համար։ Ուղղակի երեկոյան գնացինք այցի, որ հասկանանք, թե ինչ ծրագրեր են»,-ասել էր Սրբազանը։
Հարցին, թե քաղաքական հարցեր քննարկվե՞լ են՝ Տավուշի փեմի առաջնորդը պատասխանել էր. «Եթե խոսել էլ ենք՝ լավ ենք արել, բայց դրա մասին խոսակցություն չկար, որովհետև ընտանիքում էր խոսակցությունը՝ զավակներ, մայր, թոռ, հարս, այսինքն՝ մեծ ընտանեկան հանդիպում էր»։
