Ներդրումային մի քանի ծրագրերի երեկ հավանություն տրվեց կառավարության նիստում: Դրանցից մեկը «Գլոբալ Մեդիքլ Սոլյուշնս» ընկերության կողմից Հայաստանում ուռուցքաբանական ժամանակակից կենտրոնի ստեղծման ներդրումային ծրագիրն է: Համաձայն ծրագրի, կստեղծվի ներհիվանդանոցային կենտրոն, որը կունենա 150 բժշկական մահճակալ եւ համալրված կլինի ժամանակակից ախտորոշիչ եւ բուժական սարքավորումներով, ինչի համար կներդրվի 12-14 մլն դոլար:
«Սա Ազգային մրցունակության հիմնադրամի կարեւորագույն ծրագրերից է, որը մենք բավական երկար ժամանակ քննարկել ենք մասնավոր ներդնողների հետ: Մենք ունենք ներդնող, որը 12-14 մլն դոլար ներդրում է կատարելու, այս բնագավառի հայտնի ընկերություններից է, այս բիզնեսով զբաղվում է աշխարհի տարբեր երկրներում, այսինքն` փորձառու ներդրող է մեզ համար: … մենք հայտարարում ենք, որ պատրաստ ենք ներդնողի հետ քննարկել նաեւ հարկային արտոնությունների խնդիրը: Այսօր համապատասխան համաձայնագիր կստորագրվի ներդնողի հետ, որտեղ կամրագրվեն ներդնողի եւ պետության մոտեցումները, քանի որ սա պետություն-մասնավոր համագործակցության սկզբունքի ներքո իրականացվող ծրագիր է», նշեց վարչապետ Տիգրան Սարգսյանը :
Մյուս արտոնությունը տրվեց մինչեւ 300 միլիոն դրամը գերազանցող խոշոր ներդրումային 2 այլ ծրագրերին` նրանց համար մինչեւ երեք տարի ժամկետով հետաձգելով մաքսային մարմինների կողմից ավելացված արժեքի հարկի վճարման ժամկետը: Խոսքը «Կագա Գրուպ» եւ «Ռուսալ Արմենալ» ընկերությունների կողմից իրականացվող ներդրումային ծրագրերի մասին է:
«Կագա Գրուպը» Կոտայքի մարզում կառուցվող 3 հա ջերմոցային տնտեսության համար նախատեսում է իրականացնել 1,25 մլրդ դրամի չափով ներդրում, ներկրել հոլանդական ժամանակակից սարքավորումներ, ստեղծել մոտ 60 աշխատատեղ, իսկ «Ռուսալ Արմենալը» նախատեսում է իրականացնել արտադրության հերթական վերազինումը, որի արդյունքում կստեղծվի շուրջ 55 աշխատատեղ, կնվազեցվեն արտանետումները եւ վնասակար գործոնները, կբարելավվի աշխատապայմանները:
Վարչապետ Տիգրան Սարգսյանն անդրադարձավ նաեւ այս ծրագրերին. «Ջերմոցային տնտեսությունը ներդրումների համար բավական հետաքրքրական ոլորտ է դարձել, որովհետեւ մենք տեսնում ենք, որ ժամանակակից տեխնոլոգիաներ են ներմուծվում` 300 մլն դրամը գերազանցող, ինչը շատ ողջունելի է, եւ պետք է շարունակենք խրախուսել, քանի որ առաջին փորձերը ցույց տվեցին, որ սա շահութաբեր բիզնես է` եւ աշխատատեղեր են ստեղծվում, եւ ամբողջ տարվա ընթացքում են աշխատում, եւ արտահանման մեծ ներուժ է ձեւավորվում: «Արմենալում» նույնպես ժամանակակից տեխնոլոգիա են ներմուծում, որն էապես կրճատում է յուղի ծախսը, այսինքն` նաեւ ներմուծման լրացուցիչ անհրաժեշտություն չի լինելու: Էկոլոգիական վիճակն է բարելավվում, ժամանակակից լավագույն տեխնոլոգիաներից մեկն է կիրառվում, կարեւոր է, որ նաեւ էկոլոգիական խնդիր է լուծվում»:
