«Россия-1» հեռուստաալիքով և իր Solovyov Life հեռուստաալիքով հեռուստալրագրող և հաղորդավար Վլադիմիր Սոլովյովը բազմիցս ցույց է տվել հայամետ դիրքորոշում և կողմնակալ մոտեցում ադրբեջանա-հայկական հակամարտությանը։ Այս կողմնակալ մոտեցումը շարունակվեց նույնիսկ այն բանից հետո, երբ Ադրբեջանը հիմնովին լուծեց Ղարաբաղի հարցը 2020 թվականին։ 2022 թվականին Սոլովյովը Ղարաբաղի ռեժիմի ներկայացուցիչ Դավիթ Բաբայանին, որը ներկայումս կալանքի տակ է գտնվում Բաքվում, ուղիղ եթերում նույնիսկ հրավիրել էր հարցազրույցի. գրում է ադրբեջանական APA-ն։
Ծավալուն հոդվածն ամբողջությամբ Վլադիմիր Սոլովյովից «վառված» լինելու ապացույց է։
Ադրբեջանական վերնախավի հրահանգով գրված հրապարակումը ծայրից ծայր քննադատություն է, անլիարժեքության բարդույթով տառապող խռովկանի պահվածք, որը ուշադրության ու փաղաքշանքի կարիք ունի։
«Վլադիմիր Սոլովյովը, որին ռուսական պետությունը գործունեության լայն հարթակ է տրամադրել և վստահել, չի կարողացել ձերբազատվել հակաադրբեջանական հռետորաբանությունից և ադրբեջանաֆոբիկ տրամադրություններից։
Այսպես, մարտի 22-ին Մոսկվայի մարզի Crocus City Hall համերգասրահում տեղի ունեցած ահաբեկչության ժամանակ, որի հետևանքով զոհվեց առնվազն 139 մարդ, հարյուրավոր մարդիկ վիրավորվեցին, նա սկսեց փնտրել «ադրբեջանական հետք»։ Չնայած այն հանգամանքին, որ հայտնի են հարձակումն իրականացրած ահաբեկիչների անուններն ու ազգությունը, Սոլովյովը բարձրաձայնել է անհիմն հավանականության մասին, որ այդ անձանցից մեկը կարող է լինել ադրբեջանցի։ Սոլովյովը կարծես թե մոռացել է, որ հորինված վարկածները հակասում են Ռուսաստանի Քննչական կոմիտեի, ԱԴԾ-ի և այլ պաշտոնական կառույցների հայտարարություններին։ Բոլորին է հայտնի, որ Կրոկուսում տեղի ունեցած ահաբեկչությունն ամենևին էլ կապված չէ Ադրբեջանի հետ, որ ադրբեջանցիները որևէ կերպ չեն մասնակցել տեղի ունեցածին, իսկ զոհերի թվում կա ՌԴ քաղաքացի Վուգար Հուսեյնովը, ով ազգությամբ ադրբեջանցի էր։
Այսպիսով, մենք կարող ենք լիակատար վստահությամբ ասել, որ Ադրբեջանի և ադրբեջանցիների հասցեին կեղծ մեղադրանքներ ներկայացնելը քայլ է, որն առաջացել է Վլադիմիր Սոլովյովի անձնական հակակրանքից և Ադրբեջանի հանդեպ նախապաշարմունքից։
Սոլովյովը հակադրվում է Կրեմլի պաշտոնական քաղաքականությանը, որը դեմ է կրոնական և ազգային հողի վրա ահաբեկչության հնարավորությանը և մտավախություն ունի, որ միջադեպը կհանգեցնի ներքին լարվածության բազմազգ և բազմակրոն Ռուսաստանում։
Թվում է, թե յուրաքանչյուր սխալից ու կողմնակալ հայտարարությունից հետո նրան ավելի լայն հարթակ է տրվում ու պարարտ հող է նախապատրաստվում հերթական տեղեկատվական սադրանքների համար։ Սոլովյովի հայտարարությունները իրենց բնույթով վտանգավոր են և, առաջին հերթին, հանդիսանում են բազմազգ ռուսական պետության ազգային անվտանգության սպառնալիքի աղբյուր։ Ուստի ժամանակն է իրավական գնահատական տալու Վլադիմիր Սոլովյովի ելույթներին և նրա լրագրողական գործունեությանը»,- գրել է APA-ն։
