ԱՄՆ-ում 1 տոկոս կազմող ամենահարուստների եւ մնացյալ բնակչության խզումը հասել է վերջին հարյուրամյակում իր բարձրակետին: Այդ մասին գրում է Huffington Post թերթըՙ վկայակոչելով Կալիֆոռնիայի համալսարանի, ինչպես նաեւ Օքսֆորդի եւ Փարիզի տնտեսագիտության դպրոցի տնտեսագետներին:
Ամերիկացիների 1 տոկոսը 2012 թ. ստացել է տնտեսությունների ամբողջ եկամտի 19,3 տոկոսը: Նախկին ռեկորդը 1927 թ. ցուցանիշն էրՙ 18,7 տոկոս: 10 տոկոս կազմող առավել ապահովված բնակչությունը անցյալ տարի ստացել է բոլոր եկամուտների գրեթե կեսը:
Մեկ տոկոս կազմող գերհարուստները 2012 թ. իրենց եկամուտներն ավելացրել են 20 տոկոսով, մնացյալ ամերիկացիներըՙ 1 տոկոսով:
Ամենահարուստները սկզբում շատ տուժեցին 2007-2009 թթ. վարկային ճգնաժամից. նրանց վաստակը նվազեց 36 տոկոսով, մյուսներինըՙ 11,6 տոկոսով: Սակայն բաժնետոմսերի կտրուկ թանկացումը եւ 2010-2012 թթ. կորպորատիվ շահույթների ավելացումը հարուստներին թույլ տվեցին արմատապես բարելավել իրենց վիճակը եւ ստանալ ամերիկացիների եկամուտների հավելաճի 95 տոկոսը:
1990-ականների տնտեսական աճի ժամանակաշրջանում այդ ցուցանիշը կազմել էր 45 տոկոս, 2000-ականների վերելքի ժամանակՙ 65 տոկոս:
Հարուստ եւ աղքատ ամերիկացների եկամուտների խզումը էապես նվազեց 1930-ականներին եւ 2-րդ աշխարհամարտին հաջորդած տնտեսական բուռն աճի ժամանակաշրջանում: Ձեւավորվեց խիստ բազմաշերտ միջին խավ: 1973 թ. 1 տոկոս ամենահարուստների եկամուտները կազմեցին բոլոր ամերիկացիների եկամուտների ընդամենը 7,7 տոկոսը:
Սակայն 1970-ականների վերջերից իրավիճակը կտրուկ փոխվեց: Նույնիսկ 1990-ական թթ. համացանցի ծաղկման շրջանում բնակչության մեծ մասի եկամուտներն աճեցին ընդամենը 6,6 տոկոսով, մինչդեռ ամենահարուստների մոտ այդ աճը կազմեց 86 տոկոս:
