Ադրբեջանի մշակութակործան ձեռքը կարող է բռնել միայն մեր ուժեղ զինվորի ձեռքը՝ ուրիշ ոչ մի բան։ Չեմ կարծում, որ միջազգային հանրությունը կարողանա ինչ-որ բան անել, եթե, իհարկե, նրա և մեր շահերը չհամընկնեն։ Azg.am-ի թղթակցի հետ զրույցում նման տեսակետ հայտնեց Արցախի «Պատմական միջավայրի պահպանության պետական ծառայություն» ՊՈԱԿ-ի տնօրեն Արմինե Հայրապետյանը՝ անդրադառնալով ադրբեջանցիների հերթական վանդալիզմին՝ Շուշիի պատմական գերեզմանատան միջով բուլդոզերներով ճանապարհ հարթելուն։
«Պետք է ուժեղ երկիր լինես, ուժեղ բանակ և դիվանագիտական կորպուս ունենաս, որը դիվանագիտություն կվարի ուժի դիրքերից։ Քանի դեռ այդպիսին չենք, Ադրբեջանն առանց պատասխանատվություն զգալու շարունակելու է հակահայ քաղաքականություն վարել, Արցախում վերացնել հայկական հետքը։
Պարզապես այժմ տեսնելով, որ հայկական կողմն օգտագործում է Արցախում իրենց վանդալիզմը վկայող տեսանյութերը՝ ադրբեջանցիներն ավելի զգուշավոր են դարձել և չեն ուզում ավելորդ գլխացավանքի մեջ ընկնել։ Բայց վստահ եմ, որ ոչ հրապարակային կերպով շարունակում են ոչնչացնել Արցախի հայկական հուշարձանները»,- նշեց Արմինե Հայրապետյանը։
Նրա խոսքով՝ Ադրբեջանի վանդալիստական քաղաքականությունը ո՛չ 44-օրյա պատերազմից հետո, ո՛չ էլ 2023 թվականի սեպտեմբերի 19-ից հետո է սկսվել. առհասարակ միշտ որևէ տարածքի տիրանալիս այդ երկիրն փորձում է տվյալ տարածքը ամեն ինիչով իրենը դարձնել։
«Եվ ահա Արցախի պարագայում նրանց խանգարում է մեր պատմամշակութային ժառանգությունը, խանգարում են հայկական գերազմանոցները, որոնք ավելի հին են, քան իրենց ներկայությունը տարածաշրջանում։
Կոնկերտ Շուշիի պատմական գերեզմանատանը շուրջ 8 տասնյակ տապանաքար կաշ։ Մենք այնտեղ ժամանակ առ ժամանակ մաքրման աշխատանքներ ենք իրականացրել։
Գերզմանոցն անտառի մեջ է՝ ժայռի տակ։ Հայկական այդ տապանաքարերն արժեքավոր են հատկապես նրանով, որ դրանցից շատերի վրա Շուշիի պատմությունը վեր հանող բավական երկար արձանագրություններ կան։ Այդ արձանագրությունները թույլ են տալիս հասկանալ, թե ժամանակին քաղաքում ինչ արհեստներ են զարգացած եղել, ինչ արհեստով է տվյալ հանգուցյալը զբաղվել, ինչ հետաքրքրություններ է ունեցել կամ բարեգործություններ կատարել»,- ասաց Արցախի «Պատմական միջավայրի պահպանության պետական ծառայություն» ՊՈԱԿ-ի տնօրեն։
Նա միաժամանակ հավելեց, որ շուշիաբնակ Հրաչիկ Հարությունյանն արտագրել է տապանաքարերի արձանագրությունները, ինչը մի փոքր հույս է տալիս, որ Շուշիի հայկական հետքը, եթե ոչ նյութական, ապա գոնե հոգևոր մասով փրկվել է։
Հիշեցնենք, որ Կովկասյան ժառանգության պաշտպանության միջազգային կազմակերպությունը (Caucasus Heritage Watch) X-ի իր միկրոբլոգում լուսակարներ է հրապարակել, որտեղ երևում է, որ հոկտեմբերի 5-ից մինչև նոյեմբերի 3-ն ընկած ժամանակահատվածում ադրբեջանցիները բուլդոզերներով ճանապարհ են հարթել Շուշիի պատմական գերեզմանատան միջով, որը հայտնի է որպես Երևանյան դարպասների մոտի գերեզմանոց։ Գերեզմանոցը շրջապատված է խիտ անտառով, ծառերի միջև կա առնվազն 78 տապանաքար՝ հայերեն տապանագրերով, որոնք թվագրվում են 1802-1913 թվավականներին։
