Լույս է տեսել պատկերազարդ Աստվածաշունչը հայերեն լեզվով: Գիրքը Հին ու Նոր կտակարանների հակիրճ տարբերակն է` կազմված Հայ առաքելական եկեղեցու հայերեն հրատարակված Աստվածաշունչ մատյանի տեքստերով:
Բանաստեղծ եւ թարգմանիչ Մաքսիմ Ոսկանյանը, որը գիրքը ծանոթագրել ու հրատարակության է պատրաստել, երեկ «Տեսակետ» ակումբում ասաց, որ սույն նկարազարդումներով Աստվածաշունչը հրատարակվել է շուրջ 100 լեզուներով, բայց հայերեն հրատարակվում է առաջին անգամ: Մաքսիմ Ոսկանյանը գրքին ծանոթացել է ռուսերեն տարբերակով, որտեղ նկատել է բազմաթիվ սխալներ: Հետեւաբար պետք էր ոչ թե թարգմանել, այլ կազմել հայերեն տարբերակը` օգտվելով մեր եկեղեցու հրատարակած Աստվածաշնչից:
Գրքում օգտագործվել են գեղանկարչության գերմանացի պրոֆեսոր Յուլիուս Շնոր ֆոն Կարոլսֆելդի (1794-1872) փայտի վրա արված փորագրությունների 240 պատկերները:
Մաքսիմ Ոսկանյանն ասում է, որ պատկերազարդ Աստվածաշունը մատչելի է եւ նախատեսված բոլոր տարիքի ընթերցողների համար:
Պատկերազարդ Աստվածաշունչը հրատարակվել է «Լուսաբաց» հրատարակչությունում: Ըստ հրատարակիչ Վիտալի Ասլանյանի` «Լուսաբացը» ընդհանրապես նպատակ է դրել հրատարակելու հոգեւոր գրականություն, նաեւ գրականություն առողջ ապրելակերպի մասին: Ասվածի մի օրինակը 500 տպաքանակով տպագրված այս Աստվածաշունչն է: Այն արդեն վաճառվում է գրախանութներում` 7000-8000 դրամով:
Ըստ հրատարակչի` Կարոլսֆելդի փորագրությունների պատկերումը ուսանելի կլինի նաեւ կերպարվեստ ուսումնասիրողների համար:
