ԵՊՀ լրատվական գրասենյակ
Սեպտեմբերի 18-ից 22-ը ԵՊՀ ռեկտոր Արամ Սիմոնյանն ու Միջազգային համագործակցության վարչության պետ Ալեքսանդր Մարգարովը «SGI» (Soka Gakkai International) հիմնադրամի նախագահ Դաիսակու Իկեդային ԵՊՀ պատվավոր դոկտորի կոչում շնորհելու եւ Սոկա համալսարանի հետ համագործակցության պայմանագիր կնքելու նպատակով մեկնել էին Ճապոնիա:
Այցի ընթացքում ԵՊՀ պատվիրակությունը հանդիպել է Ճապոնիայի Սոկա համալսարանի ղեկավարության եւ ուսանողության հետ, ինչպես նաեւ այցելել «SGI» հիմնադրամի մշակութային կենտրոններ եւ միջնակարգ դպրոց:
ԵՊՀ-ի համագործակցությունը ճապոնական Սոկա համալսարանի հետ սերտացավ, երբ դեռեւս 2012թ հունիսին ՀՀ նախագահ, ԵՊՀ խորհրդի նախագահ Սերժ Սարգսյանը Ճապոնիա կատարած պաշտոնական այցի ընթացքում այցելել էր նաեւ Տոկիոյի Սոկա համալսարան, որտեղ Սերժ Սարգսյանին շնորհվել էր համալսարանի պատվավոր դոկտորի կոչումՙ նախագահին հանձնելով ոսկե մեդալը:
«SGI» հիմնադրամը մասնաճյուղեր ունի ամբողջ աշխարհում: Ներառում է թանգարաններ, մշակութային կենտրոններ, բարձրագույն եւ միջնակարգ կրթական հաստատություններ: Խաղաղության, հանդուրժողականության եւ մարդասիրության գաղափարները տարածող միության հիմնադիրն է մտավորական Դաիսակու Իկեդան:
Հայկական պատվիրակությանը մեծ շուքով են դիմավորել օդանավակայանում. շուրջ 50 մարդ հայկական պետական խորհրդանիշները պատկերող պաստառներով ողջունել են համալսարանականներին եւ ընթերցել Դաիսակու Իկեդայի ուղերձը:
Հայկական պատվիրակությունն այցելել է հիմնադրամի մշակութային կենտրոն-թանգարան, որտեղ կան տարբեր ազգերի մշակույթները ներկայացնող 200-ից ավելի երաժշտական գործիքներՙ դաշնամուրներ, երգեհոններ եւ այլն: Ի դեպ, այցելուները կարող են նվագել այդ գործիքները: Թանգարանում մի առանձին ցուցապատ էլ նվիրված է «Հայաստանի փոքրիկ երգիչներ» երգչախմբին. ներկայացված են փոքրիկ երգիչներիՙ Ճապոնիայում ունեցած ելույթները: Ընդ որումՙ ցուցասրահում առկա մատյանում այցելուները կարող են նաեւ իրենց տպավորությունների մասին գրել:
ԵՊՀ ռեկտորը Սոկա համալսարանում հանդիպել է բուհի ղեկավարության հետ: Հայկական պատվիրակությանը համալսարանի ուսանողները դիմավորել են «Էրեբունի-Երեւան» երգով, ինչը մեծ տպավորություն է գործել պատվիրակության անդամների վրա:
Արամ Սիմոնյանը եւ Սոկա համալսարանի ռեկտոր, պրոֆեսոր Յոշիհիսա Բաբան ստորագրել են փոխըմբռնման հուշագիր, ըստ որիՙ երկկողմ համագործակցության շրջանակում կողմերն իրականացնելու են մասնավորապես պրոֆեսորադասախոսական անձնակազմի, աշխատակիցների եւ ուսանողների, համատեղ հետազոտությունների եւ ակադեմիական տեղեկատվության ու հրատարակությունների փոխանակում, խորհրդատվություն եւ այլ գործունեություն, ինչը կնպաստի 2 բուհերի զարգացմանը:
Արամ Սիմոնյանը Սոկա համալսարանի ռեկտորի կողմից արժանացել է բուհի բարձրագույն մեդալի, իսկ համալսարանի ուսանողական միավորման ներկայացուցիչ Սինձի Յամազակին բարեկամության պատվոգիր է հանձնել ԵՊՀ ռեկտորին: «Գիտենք, որ Ձեր համալսարանում ոչ միայն որակյալ մասնագետներ են պատրաստվում, այլեւ հիանալի սերունդ դաստիարակվում: Եվ դա արվում է ԵՊՀ պրոֆեսորադասախոսական անձնակազմի, մասնավորապես Ձեր տքնաջան աշխատանքի շնորհիվ: Աշխատանք, որը հիմնված է գիտական եւ կրթական սերտ համագործակցության, ինչպես նաեւ փոխանակման արդյունավետ ծրագրերի վրա: Երկու համալսարանների հետագա սերտ համագործակցությունը հաստատելու համար մեր համալսարանի ղեկավարության եւ ուսանողների անունից պատիվ ունենք հանձնելու այս պատվոգիրը»,- նշել է Սինձի Յամազակին:
Այնուհետեւ հանդիսությունների դահլիճում, որտեղ ներկա է գտնվել ավելի քան 5 հազար մարդ (հիմնականում Սոկա համալսարանի շրջանավարտներ), Արամ Սիմոնյանը խաղաղասիրական անձնվեր գործունեության, մարդասիրական արժեքների տարածման եւ արմատավորման գործում ձեռք բերած ակնառու նվաճումների համար Դաիսակու Իկեդայի դիպլոմը, ԵՊՀ ոսկե մեդալն ու պատվավոր դոկտորի վկայականը հանձնել է Յոշիհիսա Բաբային: «Ինձ համար մեծ պատիվ է այսօր ձեր համալսարանում գտնվելը: Շնորհակալ եմ «SGI» միությանը հրավերի համար: Մեր համալսարանների միջեւ համագործակցությունը նոր է սկսվել, սակայն վստահությամբ կարող եմ ասել, որ սա միայն առաջին քայլն է նոր համամարդկային արժեքներ ստեղծելու գործում: Մեզ համախմբում է կրթության եւ մշակույթի միջոցով մարդկության զարգացման եւ բարգավաճման գաղափարը»,- նշել է ԵՊՀ ռեկտորը:
Դաիսակու Իկեդա
Դաիսակու Իկեդան ծնվել է 1928-ին Տոկիոյում: Նա մանկավարժ է, փիլիսոփա, բեղմնավոր հեղինակ եւ մեծ մարդասեր: Մեծ ներդրում ունի համաշխարհային մարդասիրական կրթության, միջմշակութային երկխոսության եւ խաղաղության քարոզման գործընթացում: Նրա հիմնադրած «SGI» (Soka Gakkai International) կառույցը հիմնված է հումանիստական, խաղաղ կյանքն ապահովող հասարակության կառուցման վրա: Այսօր արդեն հիմնադրամն ամբողջ աշխարհում ունի ավելի քան 12.5 մլն անդամ: Իկեդան իր սկզբունքները քարոզող մանկապարտեզներ է հիմնադրել Մալայզիայում, Սինգապուրում, Հոնկոնգում եւ Կորեայում, ինչպես նաեւ տարրական դպրոցներ ու «JUNIOR HIGH SCHOOL» հիմնել Բրազիլիայում: Նա նաեւ հիմնադիրն է մի շարք միջազգային շահույթ չհետապնդող խաղաղության եւ մշակութային հաստատությունների: Կրթության, մշակույթի եւ խաղաղության տարածման գործում իր ներդրած ավանդի համար Դաիսակու Իկեդային շնորհվել է 300 պատվավոր դոկտորի կոչում աշխարհի տարբեր բուհերի կողմից: Նա արժանացել է նաեւ ՄԱԿ-ի «Խաղաղության մեդալ»-ի, «Simon Wiesenthal Center»-ի հանդուրժողականության մրցանակի, «ROSA PARKS» մարդասիրական մրցանակի եւ այլն:
Սոկա համալսարան
Սոկա համալսարանը հիմնադրվել է 1971-ին Տոկիոյում: Համալսարանի կրթության հիմքում մշակույթն է եւ կենսական հողը, որն էլ յուրաքանչյուր նոր սերնդի ակունքն է: Բուհի գաղափարախոսության համաձայնՙ համալսարանը մի վայր է, որտեղ պետք է ծնվեն մարդասիրական կրթական սկզբունքներով ձեւավորված անհատներ: Մանկավարժական կազմը խթանում է ուսանողի ստեղծագործական, գիտական ձգտումներըՙ պատրաստելով իմաստուն, մարդասիրության, հարգանքի ու բարոյական արժեքների վրա հիմնված ուժեղ անհատներ: Սոկա համալսարանի հիմնարար սկզբունքներն ենՙ ստեղծել մարդասիրական կրթություն, լինել նոր մշակույթի բնօրրան եւ խաղաղության ամրոց մարդկության համար:
