Բրիտանական դեսպանատան հրավերով, Հայաստանում Բրիտանիայի օրեր ծրագրի շրջանակում, Երեւանում է Լանս Փրայսը, որը անգլիական Լեյբորիստական կուսակցության հաղորդակցության բաժնի ղեկավար է եղել 2000-2001թթ., ինչպես նաեւ վարչապետ Թոնի Բլերի մամլո խոսնակը 1998-2000թթ:
Լանս Փրայսը նաեւ գրող է, հայտնի լրագրող եւ քաղաքական մեկնաբան: Աշխատել է The Guardian, Daily Telegraph, The Times, Independent Evening Standard, New Statesman, Today Programme, Newsnights, Panorama, Question Time, Channel Four News, BBC լրատվամիջոցներում:
Հինգշաբթի օրը, Լանս Փրայսը ունկնդիրներին ներկայացրեց իր աշխատանքային փորձը, ինչպես նաեւ վերլուծեց 30 տարիների ընթացքում բրիտանական մամուլի զարգացման կարեւոր դրվագները:
Լանս Փրայսն ուրախությամբ նշում է, որ մեդիան այսօր բաց է` եւ հետաքրքրական է աշխատել լրատվամիջոցներում: Չնայած այսօր Twitter-ն է դարձել լուրեր հաղորդելու, տարածելու ամենաարդյունավետ միջոցը:
Հիշելով BBC աշխատանքային տարիները` նա ասաց. «Երբ BBC-ում Հայոց ցեղասպանության մասին նյութ էի պատրաստում, թուրքերն այդ ժամանակ ակտիվացան ու ասում էին, որ ապատեղեկատվություն եմ տարածում: Ինձնից օրեր պահանջվեցին ղեկավարներիս համոզելու, որ կողմնակալ տեղեկատվություն չեմ հաղորդել, այլ` իրական»:
Հիշելով վարչապետ Թոնի Բլերի հետ իր աշխատանքային համագործակցությունը` լրագրողը նշեց. «Թ. Բլերը շատ էր կարեւորում ԶԼՄ-ներին եւ մեծ ուշադրություն էր դարձնում ինչպես լրագրողներին, այնպես էլ լրատվամիջոցներին: Ըստ Բլերի` մեդիան իրականում վայրենի գազան է, որը փորձում է մարդկանց անունը փչացնել: Թոնի Բլերը, լինելով ամենաազդեցիկ մարդկանցից մեկը, լրատվամիջոցների զոհն էր»:
Լանս Փրայսը ուրախությամբ նշեց, որ Թոնի Բլերի ղեկավարման օրոք կառավարությունում ավելի շատ կանայք էին աշխատում, քան այժմ: Անդրադառնալով եթերին, ցավով էլի նույն միտումը նկատեց, որ կանայք եթերում ավելի քիչ են այսօր, քան, օրինակ, 90-ական թվականներին: Սակայն դա այժմ միայն եթերին չի վերաբերում, այլեւ` կառավարման մարմիններին նաեւ:
Բանախոսը նշեց նաեւ, որ Բրիտանիայում հարգված մասնագիտությունների շարքում լրագրությունը չի մտնում եւ այն վերջին հորիզոնականներում է:
Լրագրողի կարծիքով` տեխնիկական հեղափոխությունը ստիպեց, որ լրատվամիջոցներն ավելի բաց լինեն:
Անդրադառնալով հանրության նախընտրությանը` Լանս Փրայսը նշեց, որ 2006թ. սկսած 50 տոկոսից ավելին Բրիտանիայում կարդում է թերթ, իսկ երիտասարդների միայն 30 տոկոսն է նայում հեռուստացույց. «Իրադարձությունների զարգացմանը, լուրերին մարդիկ հետեւում են կայքերի, ֆեյսբուքյան էջերի միջոցով: Հեռուստատեսությունն ու ռադիոն իրենց դիրքերը զիջում են: Ահա թե ինչու բուռն իրադարձությունների զարգացման ընթացքում Չինաստանում եւ Իրանում ինտերնետը արգելափակվում է: Բայց դա չի նշանակում, որ մարդիկ լուրջ լրատվություն չեն ցանկանում ստանալ, նրանք կայքերում տեղադրված լուրերն անվանում են «աղմուկ», եւ երեկոյան յուրաքանչյուրը ցանկանում է դիտել հեռուստացույց` հասկանալու իրողությունը»:
Լանս Փրայսի կարծիքով` լրագրությունն ավելի շատ երկխոսություն է, քան` դասախոսություն:
Լանսը մամուլի քարտուղարներին, որոնք հաճախ ստում են, խորհուրդ տվեց. «Երբեք մի խաբեք: Օրինակ` միակ սուտը, որն ասել եմ մամուլի խոսնակ եղած ժամանակ, այն է, որ երբ լրագրողները հետաքրքրվեցին` արդյոք վիճե՞լ են ֆինանսների նախարարն ու վարչապետը, ասացի` չգիտեմ: Ես մամուլի քարտուղարներին խորհուրդ կտամ երբեք չասել no comment, դա ամենասարսափելի պատասխանն է: Այդ մասին գրել եմ նաեւ իմ գրքերից մեկում»:
