Սովորաբար Ազգային ժողով-կառավարություն հարցուպատասխանին պարզաբանումներ են տրվում հասարակությունում առկա հրատապ հարցերի վերաբերյալ: Երեկ, օրինակ, ԲՀԿ-ական պատգամավոր Վահագն Մախսուդյանն ուզում էր պատկերացնել, թե ինչպե՞ս է Հայաստանն առեւտուր անելու Մաքսային միության տարածքում, երբ սահման չունի ստեղծվելիք մաքսային տարածքի երկրների հետ: Վարչապետ Տիգրան Սարգսյանը բացատրեց, որ ինչպես Մաքսային միության մյուս պետություններում, այնպես էլ Հայաստանում տրվելու են միասնական ձեւաչափի այնպիսի փաստաթղթեր, դրանք կճանաչվեն Մաքսային միության տարածքի երկրներում, եւ եթե հայկական ապրանքն այդ փաստաթղթերով հայտնվի Մաքսային միության տարածքում` մաքսազերծման անհրաժեշտություն չի առաջանա, քանի որ տվյալ տարածքի երկրներում տրված միանման փաստաթղթերը հիմք են ընդունվելու: Այդպիսով` զգալի կպակասի սահմանանցման ծախսը, որ սովորաբար անում են ապրանքներն արտահանելիս:
Արամ Մանուկյանին պատասխանելիս վարչապետը նշեց, թե Մաքսային միության պայմանագիրը դեռ չկա, կան նախագծեր, բանակցություններ, իսկ պայմանագրի առկայության դեպքում այն հրապարակվելու է, Ազգային ժողովն էլ մանրակրկիտ քննարկելու է այդ պայմանագիրը:
Նիկոլ Փաշինյանը Փակ շուկայի վերաբերյալ իր սիրելի թեման կրկին բարձրացրեց` անհասկանալի համարելով կառավարության լռությունը եւ գործառույթների չկիրառումը: Վարչապետը նշեց, թե մշակույթի ու քաղաքաշինության նախարարներն իրեն զեկուցել են, թե հարցը քննարկվել է: Այնուհետեւ խոսակցությունը գնաց բարձրացված տոներով. պատգամավորը եզրակացրեց, որ կառավարությունն իր գործառույթները չի կարողանում իրականացնել` օլիգարրխների շահերին տուրք տալով: Վարչապետը եւս խստացավ, նշելով, թե Փաշինյանի համար ընդհանրապես կարեւոր չէ իր հարցի պատասխանը, այլ միայն ցանկանում է իր գնահատականները հնչեցնել, սեփական ամբիցիաները բավարարել եւ քաղաքական վարկանիշ բարձրացնել, ու այդ պատճառով ինքն էլ է իրեն վերապահում գնահատականներ տալ նրան. «Ձանձրացել ենք Ձեր գնահատականներից», ասաց` նշելով, թե այդ գնահատականները դառնում են անհետաքրքիր: Միաժամանակ` նա խոստովանեց, որ Փակ շուկայի հետ կապված կան խնդիրներ, մշակույթի նախարարությունում այդ ուղղությամբ լուրջ քննարկումներ են եղել, սանկցիաներ կիրառվել, հասարակությունը հետեւում է ընթացքին, եւ ի վերջո լուծումը լինելու է:
ՀՅԴ-ական Աղվան Վարդանյանին հետաքրքրում էր, թե ի վերջո ինչպե՞ս է եղել, որ նախագահը հայտարարել է աշխատավարձերի բարձրացման մեկ ժամկետ, իսկ նոր բյուջեով այլ ժամկետ է նշվում: Կառավարության աշխատակազմի ղեկավար-նախարար Վաչե Գաբրիելյանը բացատրեց, որ սրընթաց բարձրացումը տնտեսավարող սուբյեկտների մոտ բարդությունների կբերեր` արդեն իսկ հուլիսին բարձրացվել էր նվազագույն աշխատավարձը: Այնպես որ ընտրվել է աշխատավարձերի բարձրացման փուլային եղանակը` 2014 թվականի հուլիսի 1-ից ընդհանուր միջինացված 40 տոկոսով կբարձրանան բոլորի աշխատավարձերը (տարբեր ոլորտներում տարբեր տոկոսներ են), իսկ հունվարի 1-ից` ուժային կառույցների աշխատակիցների աշխատավարձերը: Միաժամանակ նա տարընթերցում չգտավ մոտեցումների մեջ:
